Тадбирда журналистлар, соҳа олимлари, тадқиқотчилар ҳамда матбуот котиблари иштирок этиб, замонавий медиа маконида аёлларнинг ўрни ва уларнинг касбий қиёфасини шакллантириш масалаларини муҳокама қилди.

Давра суҳбати давомида бугунги кунда журналист аёлларнинг ижтимоий фаоллиги, жамиятда кечаётган ислоҳотларни ёритишдаги ўрни ва таҳлилий материаллар тайёрлашдаги ҳиссаси алоҳида таъкидланди. Қайд этилганидек, миллий журналистикамизда хотин-қизларнинг муносиб ўрни бор ва улар соҳада самарали меҳнат қилиб келмоқда.

Мулоқотда Ўзбекистон журналистлар уюшмаси раиси вазифасини бажарувчи Шуҳрат Орипов уюшманинг жорий фаолияти, келгуси режалари ҳамда аёлларга мўлжалланган янги лойиҳалар ҳақида маълумот берди. У, айниқса, журналист аёлларни қўллаб-қувватлашга қаратилган ташаббусларга алоҳида тўхталиб ўтди.

Йиғилиш қизғин мунозаралар руҳида ўтди. Иштирокчилар томонидан қатор муҳим ташаббуслар илгари сурилди. Жумладан, «Атиргул» ижодий танловини қайта тиклаш, таҳририятларда «Маҳорат мактаблари»ни ташкил этиш, шунингдек, аёлларнинг медиасаводхонлигини оширишга қаратилган лойиҳаларни кенгайтириш таклифлари билдирилди ва қўллаб-қувватланди.

Тадбир якунида «Журналист аёллар кенгаши» йиғилишларини ҳар ойда мунтазам ўтказиб бориш, шу орқали аёллар журналистикасини ривожлантиришга қаратилган аниқ таклиф ва ташаббусларни ишлаб чиқишга келишиб олинди.

Зулхумор Акбарова