Солҳои охир шумораи ташрифи сайёҳони хориҷӣ ба Ӯзбекистон пайваста меафзояд. Соли 2025 ин нишондиҳанда нисбат ба соли 2016 қариб шаш баробар, содироти хидматрасониҳои сайёҳӣ бошад, ёздаҳ баробар зиёд шудааст. Ҳамзамон, дар мамлакат талабот ба инфрасохтори замонавӣ барои баргузории чорабиниҳои бузурги байналмилалӣ низ меафзояд.
Маҷмаа имкони баргузории чунин чорабиниҳоро дар шаҳр боз ҳам васеъ мекунад. Конгресс-холл барои баргузории форумҳо, мулоқотҳои сатҳи олӣ ва дигар ҳамоишҳои бузург пешбинӣ шудааст.
Дар доираи лоиҳа, ки 60 миллион доллар арзиш дорад, бинои дорои масоҳати 14,5 ҳазор метри мураббаъ бунёд мешавад. Ҳоло корҳои асосии бетонрезӣ анҷом ёфта, кашидани шабакаҳои берунии муҳандисӣ, сохтмони намо ва боми бино идома дорад.
Дар ҳамин майдон меҳмонхонаи «Hilton Garden Inn» бо арзиши 37 миллион доллар низ қомат меафрозад. Дар меҳмонхонаи ҳафтошёнаи дорои 212 ҳуҷра бунёди таваққуфгоҳи зеризаминии автомобилҳо низ пешбинӣ шудааст. Сохтмони конструксияҳои асосии бино анҷом ёфта, ҳоло корҳои сохтмони деворҳои дохилӣ, шабакаҳои муҳандисӣ ва фасад идома доранд.
Боз як лоиҳа – сохтмони меҳмонхонаи «Holiday Inn» бо арзиши 39,6 миллион доллар мебошад. Ин иншоот низ ҳафтошёна буда, аз 212 ҳуҷра иборат хоҳад буд ва дар паҳлуи он маркази тиҷоратии дуошёна низ бунёд мегардад. Дар меҳмонхона корҳои васли бом ва сохтмони деворҳои дохилӣ, дар таҳхонаи маркази тиҷоратӣ бошад, марҳалаи ниҳоии бетонрезӣ идома дорад.
Сарвари давлат бо рафти корҳо дар иншоот шинос шуда, таъкид кард, ки онҳо барои дар сатҳи баланд баргузор намудани чорабиниҳои байналмилалӣ, васеъ кардани доираи хидматрасониҳои сайёҳӣ дар Бухоро аҳамияти калон дошта, ин иқдом ба афзоиши даромади аҳолӣ ва рушди минбаъдаи иқтисодиёти минтақа мусоидат хоҳад кард.
Аз рӯйи дар муҳлатҳои муқарраршуда ва бо риояи қатъии талаботи сифат ба анҷом расонидани корҳои сохтмон супоришҳо дода шуданд.
