Имрӯз, 7 октябр, дар конфронсҳои бахшида ба Рӯзи байналмилалии пахта ва амнияти озуқавории кишварҳои рӯ ба рушд, ки ба баҳр роҳ надоранд, котиби матбуоти Сарвари давлат Шерзод Асадов муроҷиати Президенти Ҷумҳурии Ӯзбекистон Шавкат Мирзиёевро ба иштирокдорони чорабиниҳо қироат кард.
Дар муроҷиат таъкид шудааст, ки пахтакорӣ дар Ӯзбекистон ба сатҳи нав баромадааст. Олимони кишвар тақрибан 300 навъи пешпази пахтаро ба вуҷуд овардаанд ва равандҳои кишту кор то ҷамъоварии ҳосил механиконида шудаанд. Ба шарофати технологияҳои муосири кишоварзӣ ҳосилнокӣ дар баъзе хоҷагиҳо ба 100 сентнер аз як гектар мерасад.
Президенти Ӯзбекистон ба таъсири тағйирёбии иқлим, норасоии об ва халалдор шудани занҷираҳои таъминот ба амнияти озуқаворӣ таваҷҷуҳ зоҳир намуд. Барои кишварҳои ба баҳр роҳнадошта хароҷоти баланди нақлиётӣ ҳамоно монеаи ҷиддӣ боқӣ мемонад. Дар ин робита, Ӯзбекистон ҷонибдори коҳиш додани маҳдудиятҳо дар тиҷорат ва логистикаи маҳсулоти озуқаворӣ ва содда намудани қоидаҳои интиқоли он мебошад.
Дар паём ҳадаф гузошта шудааст, ки то соли 2030 истеҳсоли маҳсулоти озуқаворӣ ду баробар ва ҳаҷми содироту арзиши иловашуда се баробар зиёд карда шавад. Пешниҳод гардид, ки барномаи ҳамкории озуқаворӣ таҳия шавад, ки кишварҳои Осиёи Марказӣ, давлатҳои ба баҳр роҳнадошта ва шарикони транзитиро муттаҳид намояд. Ҳамчунин тавсеаи лоиҳаҳои муштарак оид ба коркард, нигоҳдорӣ ва интиқоли маҳсулот пешниҳод гардид.
Дар чорабинӣ директори генералии Созмони озуқа ва кишоварзии Созмони Милали Муттаҳид (ФАО) Цюй Дунъюй, директори иҷроияи Кумитаи байналмилалии машваратӣ оид ба пахта (ICAC) Эрик Б. Трахтенберг ва муовини директори генералии Созмони ҷаҳонии савдо Жан-Мари Погам ба ислоҳоти Президент Шавкат Мирзиёев дар соҳаи пахтакорӣ баҳои баланд доданд.
Онҳо таъкид карданд, ки аз байн бурдани меҳнати маҷбурӣ ва гузариши босуръат аз содироти пахтаи хом ба коркарди амиқи он дастоварди назаррас буда, барои дигар кишварҳо низ намуна ба ҳисоб меравад.
