Дар маросими ифтитоҳ дар Минск намояндагони ҳокимияти
вилояти Намангон ва доираҳои соҳибкории Ӯзбекистон бо роҳбарии ҳокими вилоят
Шавкат Абдураззоқов, сафири Ӯзбекистон Нуриддин Мамажонов, муовини якуми раиси
Кумитаи иҷроияи шаҳри Минск Александр Комендант, инчунин намояндагони як қатор
вазорату идораҳои Беларус иштирок карданд.
Александр Комендант зимни суханронӣ дар маросим қайд
кард, ки ба шарофати созишҳои дар сатҳи олӣ бадастомада, ҳамкориҳои байни
Беларус ва Ӯзбекистон дар самти созанда рушд мекунанд.
«Чорабиниҳои имрӯза
яке аз қадамҳои аввал дар доираи формати нави ҳамкорӣ мебошанд. Бовар дорам, ки
ин хонаҳои тиҷоратӣ дар байни сокинони Минск ва вилояти он талаботи зиёд пайдо
хоҳанд кард», гуфт ӯ.
Кушодашавии хонаҳои тиҷоратӣ натиҷаи созишҳои байни
Президенти Ӯзбекистон Шавкат Мирзиёев ва Президенти Беларус Александр Лукашенко
мебошад, ки ба рушди минбаъдаи савдои мутақобила ва таҳкими робитаҳои соҳибкорӣ
равона шудаанд.
Дар ҳоли ҳозир дар хонаҳои тиҷоратӣ номгӯи васеи маҳсулоти
нассоҷӣ, аз ҷумла дастмолҳо, халатҳо, маҳсулоти трикотажӣ, либос барои кӯдакон,
занон ва мардон, инчунин рӯйпӯшҳои хоб пешниҳод мешаванд. Ба нархҳои рақобатпазирӣ
ва сифати маҳсулот таваҷҷуҳи махсус дода шудааст.
Дар ояндаи наздик номгӯи маҳсулот аз ҳисоби дигар маҳсулоти
дар вилояти Намангон истеҳсолшаванда васеъ карда мешавад. Аз ҷумла, ба фурӯш
баровардани меваҳои хушк, шарбатҳо, маҳсулоти консервшуда ва мураббо ба нақша
гирифта шудааст.
Ба гуфтаи муассиси хонаи тиҷоратӣ, соҳибкори намангонӣ Ҳакимҷон
Файзуллоев, нархи маҳсулот дар сатҳи барои аҳолӣ дастрас муайян шудааст. Ба
андешаи ӯ, ин омил таваҷҷуҳи истеъмолкунандагони Беларусро ба маҳсулоти Ӯзбекистон
бештар хоҳад кард.
