13 banddan iborat qarorga ko'ra, Isroil 60 kun ichida qo'shni mamlakat janubidan o'z qo'shinlarini olib chiqib ketadi, “Hizbulloh” kuchlari Litani daryosidan shimolga chekinishi kerak, janubiy chegara hududida esa Livan xavfsizlik kuchlari va muntazam armiya joylashib oladi. Mamlakat janubida yashovchi livanliklar, sulh e'lon qilinganidan so'ng, ko'pchiligi xarobaga aylangan uylariga qaytishni boshladi. The New York Times gazetasining Planet Labs tomonidan sun'iy yo'ldoshdan olingan suratlar tahliliga asoslangan hisob-kitoblariga ko'ra, noyabr oyi boshida Isroil mudofaa kuchlari Livanda, asosan, mamlakat janubida va Bayrut atrofida mingdan ortiq binolarni vayron qilgan. Mays al-Jabal va Mhabib kabi ba'zi qishloqlar deyarli vayron qilingan. Isroil rasmiylari ularning maqsadi “Hizbulloh”ning bu qishloqlarda joylashtirilgan qurol-yarog' omborlari, platsdarm va tunnellarini o'z ichiga olgan harbiy infratuzilma ekanini aytdi. Shuningdek, “Hizbulloh”ning Isroilni o'qqa tutishi oqibatida ham katta vayronagarchiliklar kuzatilmoqda, biroq hozircha mahalliy aholining aksariyati sulh buzilishi va jangovar harakatlarning qayta boshlanishidan qo'rqib qaytishni istamayapti, deb xabar beradi meduza.io.