Qayd etilishicha, umumiy inflyatsiya pasayishda davom etib, yil yakuniga kelib 6,5 foiz atrofida shakllanishi kutilmoqda. Shu bilan birga, narxlar barqarorlashuvi surʼati sekinlashayotgani va tashqi omillar taʼsiri kuchayayotgani kuzatilmoqda.
2026-yil mart oyida yillik inflyatsiya 7,1 foizgacha pasaygan boʻlib, bu, asosan, oʻtgan yildagi yuqori baza taʼsirining chiqib ketishi bilan izohlanmoqda. Bazaviy inflyatsiya 5,7 foizni tashkil etgan.
Iqtisodiy faollik yuqori surʼatlarda saqlanib qolmoqda. Joriy yilning birinchi choragida yalpi ichki mahsulot 8,7 foizga oʻsgan. Xizmatlar, qurilish va savdo sohalaridagi faollik ichki talab yuqori ekanini koʻrsatmoqda.
Shu bilan birga, investitsiyalar, xususan toʻgʻridan-toʻgʻri xorijiy investitsiyalar hajmining ortishi iqtisodiy oʻsishni qoʻllab-quvvatlamoqda. 2026-yil uchun iqtisodiy oʻsish prognozlari 7–7,5 foizgacha oshirilgan.
Tashqi iqtisodiy muhitdagi noaniqliklar, jumladan geosiyosiy ziddiyatlar, jahon bozorida neft va oziq-ovqat narxlarining oʻsishi kabi omillar inflyatsiyaga qoʻshimcha bosim oʻtkazishi mumkinligi taʼkidlandi.
Shu bilan birga, asosiy savdo hamkor davlatlar valyutalarining mustahkamlanishi, oltin narxining yuqori darajada saqlanishi, eksport tushumlari va pul oʻtkazmalarining oʻsishi ichki valyuta bozorida barqarorlikni taʼminlamoqda.
Markaziy bankka koʻra, amaldagi qatʼiy pul-kredit sharoitlarini saqlab qolish inflyatsiyani 5 foizlik maqsadli darajaga bosqichma-bosqich tushirish va inflyatsion kutilmalarni jilovlash imkonini beradi.
Navbatdagi yigʻilish 2026-yil 17-iyun kuniga belgilangan.
