Ауғанстандық инвесторлар – Мирзад Мир Ахмад Захеэн мен Мир Насир Ахмад Мирзад Сырдария облысының Гүлстан ауданында жалпы құны 5 миллион АҚШ долларын құрайтын инвестициялық жобаларды жүзеге асыруға ниетті.
Инвесторлар алдын ала жасалған келісімдер бойынша аудандағы көпқабатты тұрғын үйлерге үлескер ретінде кіріп, шағын индустриялық аймақтан аукцион арқылы 0,96 гектар жерді сатып алып, заманауи технологияларға негізделген өндірістік цех құруды жоспарлап отыр. Ол үшін қажетті құрал-жабдықтар шетелден әкелінетін болады.
Бұл жобалар Гүлстан ауданының әкімінің міндетін атқарушы Олимжон Жураев пен инвесторлар арасында өткен кездесуінде талқыланды. Ашық әрі шынайы рухта өткен кездесу екі ел арасындағы ынтымақтастықты нығайту, әсіресе инвестиция саласындағы болашағы зор жобаларды жүзеге асыру мәселелеріне арналды.
Инвесторларға А.Ясауи махалласындағы көпқабатты тұрғын үй құрылысына арналған жер телімдері мен «Ахиллик» махалласындағы шағын индустриялық аймақтың қызметі таныстырылды. Индустриалды аймақтағы мүмкіндіктер, өндіріс орындарындағы қолайлылықтар мен жасалған жағдайлар қонақтардың үлкен қызығушылығын тудырды.
Ауғанстандық қонақтар да ауданның туристік әлеуетін зерделеуге үлкен қызығушылық танытып, осы бағытта бірқатар жобаларды жүзеге асыруға ниетті екендіктерін жеткізді.
