Мемлекет басшылары ЮНЕСКО-ның Бүкіләлемдік мұралар тізіміне енген Регистан кешенін аралады.
Жоғары мәртебелі мейманға Шығыс сәулет өнерінің осынау жауһарының құрылыс тарихы, қайталанбас нақыштары, осы мекенге қатысты оқиғалар мен тұлғалар туралы айтылды.
Франция Президентінің сапары Самарқандта өтуі және Регистаннан бастау алуы кездейсоқ емес. Бұл мекенде екі халықтың тарихи ортақтығын бейнелейтін қырлары көп.
Әсіресе, Сайыпқыран Әмір Темір ұлы қолбасшы, сауда мен ғылымның қамқоршысы ретінде Азия мен Еуропада болған тарихи өзгерістерге үлкен әсер етті. XV ғасырда Парижде оның құрметіне «Еуропаны азат етуші» деген ескерткіш орнатылды. Әмір Темір мен Франция королі Карл VI бір-біріне хат жолдап, байланыс орнатқан. Саяси мәселелермен қатар сауда-экономикалық қарым-қатынастарға да үлкен көңіл бөлген.
Франциядағы Ұлы қолбасшы Сайыпқыран және Тимуридтер туралы көптеген ғылыми және көркем шығармалар жазылған. Мысалы, француз ойшылы әрі жазушысы Вольтердің шығармасындағы Мырза Ұлықбек, әйгілі жазушы Жюль Верннің романындағы Регистон сұлулығы туралы шабытпен жазылған.
Бүгін Франция делегациясы осы алаңда тұр. Түнгі шамдармен жарықтандырылған кешеннің сән-салтанаты мен әсемдігі қонақтардың көңіліне қуаныш сыйлауда.
Осы жерде Шавкат Мирзиёев пен Эммануэль Макрон бірге суретке түсті.
Содан кейін Президенттер «Ұлы Жібек жолы» халықаралық туристік орталығындағы «Мәңгілік қала» тарихи-этнографиялық кешенін аралады.
Мұнда ұлтымыздың ұлы өткен рәміздері жинақталған, тарихи қалаларымыздағы көрнекті орындардың көшірмелері бой көтерген. Ұлттық салт-дәстүрімізбен бірге достас халықтармен қарым-қатынас тарихы да көрініс тапқан. Атап айтқанда, Афросияб ескерткішінің қабырғаларында сақталған Корея, Қытай, Үндістан және басқа да елдердің елшілерін қабылдау рәсімінің бейнелері пайдаланылған. Мұндай мағына, тарих және бүгінгі күннің үйлесімі қонақтарға үлкен әсер қалдырды.
Мемлекет басшыларының арасында шынайы әңгіме болды. Самарқанд қаласы әлемдік өркениеттің көне бесігі болып, бүгінде халықаралық саммит пен туризм орталығына айналып келе жатқаны айтылды. Қонақтарға халқымыздың ерекше өнері, қолөнері, музыкалық мәдениеті көрсетілді.
Сапардың негізгі шаралары, соның ішінде жоғары деңгейдегі келіссөздер ертең, 2 қарашада өтеді.
