Ішкі істер министрлігі мен Ұлттық гвардия басшылығының ірі сауда және қызмет көрсету объектілерінде, оның ішінде сауда-ойын-сауық кешендері, саябақтар, базарлар және азаматтар көп шоғырланатын басқа да орындарда қоғамдық тәртіпті қамтамасыз етуді ұйымдастыру бойынша есебі тыңдалды.

Қоғамдық қауіпсіздікке төнген жаңа қауіптер мен қауіп-қатерлердің күшеюі жағдайында қоғамдық тәртіпті сақтау және азаматтардың қауіпсіздігін қамтамасыз етуде құқық қорғау органдары мен кәсіпкерлік субъектілерінің ынтымақтастығын күшейту қажеттігі баса айтылды. Сонымен бірге, қоғамдық қауіпсіздікті қамтамасыз етуге байланысты іс-шараларды жүзеге асыру кезінде кәсіпкерлік субъектілері мен азаматтардың құқықтары мен заңды мүдделерін қамтамасыз етудің маңыздылығы атап өтілді.

Мемлекет басшысы осы бағытта құқық қорғау органдарының, азаматтық қоғам институттары мен кәсіпкерлік субъектілерінің толық ынтымақтастығын қамтамасыз етуге бағытталған нормативтік құқықтық құжат жобасын әзірлеуді тапсырды.

Ішкі істер министрлігі мен Ұлттық гвардия басшылығына қоғамдық тәртіпті сақтау бойынша жұмысты одан әрі күшейту, адам көп шоғырланатын жерлерде болуы мүмкін лаңкестік актілердің және басқа да төтенше жағдайлардың алдын алуға бағытталған пәрменді шаралар қабылдау тапсырылды.