Қызыл алаңда Жеңіс шеруі өтті. Оған Беларусь Республикасының Президенті Александр Лукашенко, Қазақстан Республикасының Президенті Қасым-Жомарт Тоқаев, Лаос Президенті Тхонглун Сисулит, Малайзия Сұлтаны Ибрахим, сондай-ақ Словакия Республикасының Үкімет төрағасы Роберт Фицо және басқа да шетелдік делегациялар басшылары қатысты.
Екінші дүниежүзілік соғыстағы Жеңіс – миллиондаған адамдардың теңдессіз ерлігі, қайсарлығы мен жанқиярлығының арқасында қол жеткізілген ұлы тарихи оқиға. Бұл ортақ жеңіске майдан даласында да, тылда да шынайы қаһармандық көрсеткен Өзбекстанның көпұлтты халқы да лайықты үлес қосты.
Соғыс қарсаңында республикамыздың халқы 6 миллионнан астам еді. Сынаққа толы жылдары шамамен 2 миллион өзбекстандық майданға жұмылдырылды. Қанды шайқастарда 538 мыңнан астам отандасымыз қаза тауып, 158 мыңнан астамы хабар-ошарсыз кетті.
Ерлігі, батылдығы және әскери шеберлігі үшін Өзбекстанның 214 мыңнан астам сарбазы мен офицері жауынгерлік ордендер мен медальдармен марапатталды. 301 отандасымызға Кеңес Одағының Батыры атағы берілді, тағы 70 адам «Даңқ» орденінің толық кавалері атанды.
Өзбекстан халқының тылдағы жанқияр еңбегі де Жеңіске орасан зор үлес қосты. Республикамыз майданның сенімді тірегіне айналып, азық-түлік, киім-кешек, дәрі-дәрмек, қару-жарақ және басқа да қажетті өнімдерді жеткізіп отырды. Қысқа мерзімде Өзбекстан аумағында эвакуацияланған 170-тен астам кәсіпорын орналастырылып, қорғаныс өнеркәсібінің тұрақты жұмысы қамтамасыз етілді.
Соғыстың ауыр жылдарында халқымыз адамгершілік пен кеңпейілділіктің жоғары үлгісін көрсетті. Майданға жақын аймақтардан эвакуацияланған 1,5 миллионнан астам адам, оның ішінде 250 мыңнан астам жетім бала Өзбекстаннан пана тапты. Мейірім мен қамқорлық көрсету, мұқтаж жандарға көмек қолын созуға әрдайым дайын болу халқымыздың рухани қуаты мен асқақ адамгершілігінің жарқын көрінісі болды.
Бүгінде елімізде соғыс қаһармандары мен тыл еңбеккерлерінің ерлігін мәңгілікке ұлықтау, ардагерлерді әлеуметтік қолдау бағытында жүйелі жұмыстар жүргізілуде. Ташкент қаласында салынған «Жеңіс саябағы» мемориалдық кешені ата-бабаларымыздың ерлігі мен қайсарлығына деген терең құрметтің символына айналды.
Шеру аяқталғаннан кейін Өзбекстан Президенті Шавкат Мирзиёев Ресей Президенті Владимир Путин және басқа да мемлекет басшыларымен бірге Мәскеудегі Александр бағында орналасқан Белгісіз жауынгердің қабіріне гүл шоғын қойды.
Бұл мемориал Жеңіс жолында жанын қиған миллиондаған сарбаздардың, соның ішінде Өзбекстан перзенттерінің рухына тағзым белгісі болып, Отан қорғаушылардың ерлігі, батырлығы мен жанқиярлығының символы саналады.
Салтанатты рәсім бір минут үнсіздік жариялау, құрмет қарауылының сап түзеп өтуі және әскери оркестрдің шеруімен аяқталды.
