Мемлекет басшысы Қытай бизнесінің Өзбекстанға деген қызығушылығы әрқашан жоғары екенін атап өтті. Өткен жылдың өзінде бұл елден тартылған инвестициялар көлемі 10 миллиард доллардан асты.
«China State Construction» компаниясының директорлар кеңесінің төрағасы Чжэн Сюэсюаньмен әңгімеде Ташкент қаласындағы жол инфрақұрылымын жаңғырту бойынша бірлескен жұмыстар жоғары бағаланды. Сондай-ақ Ташкентте мәдениет нысандарын салу жөніндегі келешек жоспарлар талқыланды.
Ташкент облысында индустриялық аймақ құру жобасын бастау және компанияның автокөлік жолдарын салуға қатысуы туралы келісімге қол жеткізілді.
«China General Nuclear Power» корпорациясының төрағасы Ян Чанлимен келіссөздерде тау-кен өнеркәсібіндегі әріптестікті нығайту мәселелері басты назарда болды. Геологиялық барлау жұмыстарын жеделдету және жаңа кен орындарын игеруге қызығушылық білдірілді. Компанияның гибридті күн электр станциясын салу және кеден жүктерін сканерлеу технологияларын енгізу жоспарлары қолдау тапты.
«CAMCE» корпорациясының төрағасы Ван Бомен Ташкентте Олимпиада қалашығын салу бойынша атқарылған жұмыстар сарапқа салынды. Сондай-ақ компания басқаратын Ташкенттегі «Жаңа ұрпақ» индустриялық технопаркі қарқынды дамып жатқаны айтылды.
Бірлескен жобалар аясын кеңейтуге, әсіресе электр энергетикасы және Жаңа Ташкент қаласының инфрақұрылымын дамыту жобаларын жеделдетуге ерекше көңіл бөлінді.
«Goldwind» компаниясының төрағасы Ву Гангпен компанияның «жасыл» энергетиканы дамытуға қосқан үлесі жайлы пікір алмасылды. Өзбекстанда компаниямен бірлесе отырып жел электр станцияларына арналған қосалқы бөлшектер өндірісі жолға қойылған.
Жел генераторларын өндіруді жергіліктендіру және қазіргі жобаларды белсенді түрде жалғастыру туралы келісімге келінді.
«ZTO Express» компаниясының басшысы Ху Сянлян Президентке Өзбекстанда тауарларды кедендік рәсімдеуге көмектесетін онлайн платформа іске қосу және «ақылды» логистикалық қоймалар құру жоспары туралы ақпарат берді.
