Мемлекет басшысы кездесулердің табысты өткенін ерекше атап өтіп, бұл тарихи сапар Өзбекстан мен Пәкістан стратегиялық серіктестігінде жаңа кезеңнің басталуына негіз болатынын айтты.
Өзбекстан Президенті соңғы жылдары екіжақты ынтымақтастықтың қарқынды дамып келе жатқанын жоғары бағалады. Екі ел арасындағы сауда айналымы 400 миллион доллардан асып, 130 бірлескен кәсіпорын құрылды, Карачи мен Ташкентте сауда үйлері ашылды. Сондай-ақ, Ташкент пен Лахор арасында тікелей әуе рейстері қайта жанданды.
Үкіметаралық комиссия жемісті жұмыс атқаруда, саяси консультациялар, бірқатар іскерлік іс-шаралар мен Өзбекстан өнеркәсіп көрмесі сәтті өтті.
- Осы күндері Пәкістанның жетекші компанияларынан құралған беделді делегация Ташкентте жұмыс сапарымен жүр. Бүгін біз бизнес өкілдерімен жеке кездесу өткізіп, ортақ жоспарларды талқылаймыз, - деді Шавкат Мирзиёев.
Жоғары деңгейдегі келіссөздер барысында тараптар көпқырлы ынтымақтастықтың жаңа «даму нүктелерін» белгілеп, Жоғары деңгейдегі стратегиялық серіктестік кеңесін құру туралы келісімге келді.
Сауда айналымын айтарлықтай арттыру және оның номенклатурасын кеңейту, өнеркәсіптік кооперацияны күшейту, көлік қатынасын дамыту, бизнесті қолдау және оған қолайлы жағдай жасау мәселелері басты назарда болды.
Фармацевтика, ауыл шаруашылығы, ауыл шаруашылығы техникасын жасау, геология және минералды ресурстар, тоқыма және былғары өнеркәсібі сияқты салаларда жаңа жобаларды жүзеге асыру, сондай-ақ дайын өнімдерді үшінші елдердің нарығына экспорттау маңызды екені атап өтілді.
Тараптар БҰҰ, Ислам ынтымақтастығы ұйымы, Шанхай ынтымақтастық ұйымы сияқты халықаралық және өңірлік құрылымдар аясындағы тығыз байланыстарды әрі қарай нығайтуға келісті.
Ауғанстанның тұрақты дамуын қамтамасыз ету, сондай-ақ Палестина мәселесін дипломатиялық жолмен шешу бойынша екі елдің ұстанымдары ұқсас екені атап өтілді.
Сондай-ақ, қауіпсіздік саласындағы ынтымақтастықты кеңейтуге, терроризм, трансұлттық қылмыс, есірткінің заңсыз айналымы және басқа да қазіргі заманғы қауіп-қатерлерге қарсы күресуге екі тараптың да мүдделі екені айтылды.
Келіссөздер барысында мәдени-гуманитарлық және туристік алмасуларды дамытуға ерекше көңіл бөлінді. Мәдениет және өнер фестивальдерін өзара өткізу, сонымен қатар «Ұмра плюс» бағдарламасы аясында туристік ағынды арттыру туралы келісімдерге қол жеткізілді.
Кездесу соңында қол жеткізілген уағдаластықтар мен қол қойылған келісімдерді уақытылы әрі сапалы жүзеге асыру мақсатында екі ел үкіметтері тарапынан ауқымды «жол картасы» қабылданатыны атап өтілді.
