Кездесуде Өзбекстан мен Словения арасындағы көпжақты өзара іс-қимыл мен практикалық серіктестікті, әсіресе сауда-экономикалық және инвестициялық салаларда кеңейту мәселелері басты назарда болды.

Бүгін өткен жоғары деңгейдегі келіссөздердің нәтижелері жоғары бағаланды.

Сауда, инвестиция және кооперация салаларындағы ынтымақтастықты жандандырудың маңыздылығы атап өтілді. Сапар аясында өтетін бизнес-форум жаңа іскерлік байланыстар орнатуға және бірлескен жобаларды алға жылжытуға тиімді алаң болатыны айтылды.

Сұранысы жоғары өнімдердің өзара жеткізілімі есебінен тауар айналымын 500 миллион еуроға жеткізу шаралары талқыланды. «GSP+» жеңілдікті сауда жүйесі мен бүгін қол қойылған стандарттау туралы келісім де сауда көлемін арттыруға серпін береді.

Технологиялық жаңғыртуға басымдық бере отырып, өнеркәсіптік кооперацияны дамыту бағдарламасы әзірленеді. Бұл ретте Словенияның жетекші компанияларының Өзбекстанда электротехника, машина жасау, фармацевтика, «жасыл» энергетика, «ақылды» ауыл шаруашылығы салаларындағы жобаларға қызығушылығы қолдау тапты.

Мұндай өндірістерді Өзбекстанда, «Inpark» басқаруындағы еуропалық компанияларға арналған арнайы индустриялық паркке орналастыру ұсынылды.

Еңбек көші-қоны саласында жүйелі ынтымақтастық орнату мақсатында тұрақты жұмыс істейтін сарапшылар тобын құру және қажетті нормативтік-құқықтық база әзірлеу туралы келісімге қол жеткізілді.

Сондай-ақ, екі ел арасында тікелей әуе рейстерін ашу және өзбек өнімдерін Еуропа Одағы нарығына шығару үшін Копер портының инфрақұрылымын пайдалану мүмкіндіктерін бірлесіп зерттеу туралы уағдаластыққа қол жеткізілді.

Мәдени-гуманитарлық алмасуларды кеңейту келіссөздердің маңызды бөлігіне айналды. Экологиялық туризмді, әсіресе таулы және ауылдық өңірлерде туризмді дамыту бойынша Словения тәжірибесіне ерекше қызығушылық танытылды.

Бірлескен білім беру бағдарламаларын дамыту, соның ішінде Ташкент қаласында Жастар инновациялар форумын өткізу қажеттігі атап өтілді. Келесі жылы екі елдің Мәдениет күндері мен Люблянада Өзбек киносы апталығы ұйымдастырылады.

Ынтымақтастықтың белгіленген бағыттарын ілгерілету мақсатында биыл шілде айында Любляна қаласында Үкіметаралық комиссияның алғашқы отырысын өткізуге уағдаласты.

Сонымен қатар, қол жеткізілген келісімдер мен қол қойылған құжаттарды уақытылы және сапалы іске асыру үшін екі ел үкіметтері тарапынан жан-жақты «жол картасы» қабылданатын болды.

Кездесу соңында Президент Шавкат Мирзиёев Словения Премьер-Министрі Роберт Голобты өзіне қолайлы уақытта Өзбекстанға сапармен келуге шақырды.