Кездесу басында Мемлекет басшысы Түркіменстан Президентінің мемлекеттік сапары екі халық арасындағы көпғасырлық достық пен тату көршілік байланыстарының беріктігін айқын дәлелдейтінін атап өтті.
Өзбекстан мен Түркіменстан арасындағы достық, тату көршілік және стратегиялық серіктестікті одан әрі тереңдетудің өзекті мәселелері талқыланды.
Сауда, көлік, энергетика, су шаруашылығы және өзге де маңызды бағыттарда атқарылған жұмыстар жоғары бағаланды.
– Күмәнсіз, осы жетістіктердің барлығында Түркіменстан Халық Мәслихатының Төрағасы, құрметті Гурбангулы Бердімұхамедовтың өлшеусіз еңбегі бар, – деді Мемлекет басшысы.
Соңғы жылдары өзара сауда айналымы екі есеге артып, 1 миллиард доллардан асты. Тауар түрлерін көбейту және еркін сауда режимінің мүмкіндіктерін тиімді пайдалану арқылы бұл көрсеткішті 2 миллиард долларға жеткізуге мүмкіндік бар екені атап өтілді.
«Шават–Ташауыз» шекара маңындағы сауда аймағының іске қосылуы да өзара тауар айналымын ұлғайтуға серпін берері сөзсіз. Осы тәжірибені өзге аймақтарда, алдымен «Алат–Фараб» өңірінде қолдану жөнінде келісімге келінді.
Өнеркәсіптік кооперацияны кеңейту үшін құрылыс материалдары, фармацевтика, азық-түлік және сұраныс жоғары өзге де өнім түрлерін өндіруге бағытталған жаңа жобаларға бизнестің белсенді қатысуы маңызды екені айтылды.
Энергетика саласында тиімді және өзара пайдаға негізделген әріптестік жолға қойылғаны атап өтілді. Ынтымақтастық аясын кеңейтіп, болашағы зор кен орындарын бірлесіп игеру жөнінде уағдаластық жасалды.
Көлік саласы екі ел экономикасын байланыстыратын маңызды дәнекер саналады. Жүк тасымалы көлемі артып, кеден-логистика рәсімдері жеңілдетілуде. Тараптар Түркіменбашы портын бірлесіп дамыту және екі ел астаналары арасында тікелей әуе рейстерін қайта қалпына келтіру туралы уағдаласты.
Қол жеткізілген келісімдердің уақытылы орындалуын қамтамасыз ету мақсатында жыл соңына дейін Үкіметаралық комиссия мен Кәсіпкерлер кеңесінің кезекті отырыстары өткізіледі.
Мемлекет басшылары гуманитарлық сала көп қырлы ынтымақтастықтың берік іргетасы екенін атап өтті. Үргеніш пен Ташкентте Түркіменстан мәдениеті күндері мен түркмен фильмдерінің көрсетілімдері табысты ұйымдастырылғаны айтылды.
Ынтымақтастық қарқынын бәсеңдетпеу үшін тараптар өзара концерттер мен театр ұжымдарының шығармашылық сапарларын жүйелі өткізуге, Хиуа қаласында Жастар форумын ұйымдастыруға және бірлескен фильмдер түсіру тәжірибесін жалғастыруға келісті.
Сондай-ақ денсаулық сақтау мен медициналық ғылым саласындағы алмасулар жанданатын болды.
Келіссөздер соңында Мемлекет басшылары қол жеткізілген барлық уағдаластықтарды жүзеге асыруға арналған кең ауқымды «жол картасын» әзірлеу жөнінде жауапты тұлғаларға тапсырма берді.
