Кездесу Сиань қаласындағы «Шэньси» резиденциясында екі ел делегацияларының қатысуымен өтті.
Қытай Халық Республикасының Төрағасы Си Цзиньпин алдымен Мемлекет басшысын шынайы қарсы алып, елімізде Конституцияны жаңарту жөніндегі жалпыхалықтық референдумның сәтті өтуімен құттықтады және алдағы Өзбекстанда өтетін президенттік сайлауда үлкен табыс тіледі.
Өзбекстан Республикасының Президенті Шавкат Мирзиёев өз кезегінде Қытайға мемлекеттік сапармен келуге шақырғаны және жылы лебізін білдіргені үшін ризашылығын білдірді. Қытай басшысын маңызды саяси оқиғалардың сәтті аяқталуымен және жоғары мемлекеттік лауазымдарға қайта сайлануымен шын жүректен құттықтады.
Өзбекстан мен Қытай арасындағы жан-жақты стратегиялық серіктестік қатынастарының жаңа дәуіріндегі өзекті мәселелер жан-жақты талқыланды.
Қол жеткізілген уағдаластықтардың дәйекті түрде жүзеге асырылып жатқаны, барлық деңгейдегі өзара қарым-қатынастар қарқын алғаны, саяси диалог нығайып, маңызды мәселелер бойынша тараптар бір-бірін қолдап келе жатқаны ерекше атап өтілді.
Кедейлікті азайту, оның ішінде ауыл шаруашылығы, жерді пайдалану, шағын және орта бизнес, инфрақұрылымды жаңғырту, медициналық қызмет көрсету сапасын арттыру және кәсіби білім саласында әлеуметтік маңызы бар жобаларды жүзеге асыруда тиімді тәжірибе алмасу және практикалық шараларға ерекше назар аударылды.
Сауда-экономикалық саладағы өзара тиімді практикалық ынтымақтастықты кеңейту перспективалары егжей-тегжейлі талқыланды. Бұл ең алдымен заманауи өнеркәсіп нысандарын, инвестициялық және жоғары технологиялық кәсіпорындарды салу бойынша бірлескен жобаларды білдіреді.
Күні бұрын өткен бизнес-форум қорытындысы бойынша 25 миллиард долларды құрайтын перспективалық жобаларды жүзеге асыру туралы келісімдерге қол қойылды.
Баламалы энергетиканы дамыту бойынша, күн, жел және су электр станцияларын салу, күн панельдерін, электр жабдықтарын, трансформатор, аккумулятор өндіру, басқару процестерін цифрландыру және мамандарды оқытумен байланысты жобалардан тұратын инвестициялық-технологиялық ынтымақтастық бағдарламасын іске асыруға ерекше назар аударылды.
Жаңа буынды автомобильдер шығару саласындағы ынтымақтастықты кеңейту – электрлі және гибридті көліктерді құрастыратын заманауи зауыттарды іске қосу мүмкіндіктері талқыланды.
Ілеспе секторлардағы жобаларды дамытудың маңыздылығы атап өтілді. Атап айтқанда, бұл мыс, литий, сирек металдарды терең өңдеу негізінде электротехника өнімдерін шығаратын жоғары технологиялық кластерді құруды қамтиды.
Сонымен қатар, пластмасса, химия өнімдері, металл бұйымдары, азық-түлік, құрылыс материалдары, дайын тоқыма бұйымдарын өндіру, биотехнологиялық кластер құру саласындағы ынтымақтастықты тереңдетуге және кеңейтуге екі елде мүдделі екені айтылды.
Қытайдың жетекші банктері және «Жібек жолы» қоры, сондай-ақ Азия инфрақұрылымдық инвестициялар банкімен тиімді қаржылық және техникалық ынтымақтастықтың бүгінгі деңгейі жоғары бағаланды.
Екі ел өңірлерінің ынтымақтастық әлеуетін іске асыру, соның ішінде Сырдария облысын «Озық технологиялы аймаққа» айналдыру бойынша бірлескен шаралар белгіленді.
Белсенді байланыс пен әуе қатынасының қайта жандануын ескере отырып, биылғы жылы екі елдің қалалары мен облыстарының бірінші форумын Өзбекстанда өткізу мәселесі пысықталатын болады.
Кейінгі жылдары екі есеге өскен өзара тауар айналымын арттыру үшін тауардың нысаналы индикаторлары мен құрамы белгіленді.
«Қытай-Қырғызстан-Өзбекстан» темір жолын салу бойынша тәжірибелік жұмыстарды тезірек бастаудың маңыздылығы сөз болды.
Гуманитарлық саланы талқылау барысында білім және туризм салаларындағы ынтымақтастықты жандандыру, өзара мәдениет, өнер және кино күндерін өткізу, дәстүрлі медицина, көз және басқа да ауруларды емдеу, вакцина және фармацевтикалық өнімдер өндірісіне қатысты бағдарламаларды жүзеге асыру қажеттігі туралы бірауыздан пікір айтылды.
Сондай-ақ өңірлік күн тәртібі мен халықаралық саясаттың өзекті мәселелері бойынша пікір алмасылды.
Кездесу әдеттегідей сенім, ашықтық және достық рухында өтті. Өзбекстан басшысы Қытай басшысын Өзбекстанға сапармен келуге шақырды. Ұсыныс ризашылықпен қабылданды.
