Мемлекет басшысы орденді табыстай отырып, Гурбангулы Бердімұхамедовтің бауырлас елдер арасындағы дәстүрлі достықты, тату көршілік пен стратегиялық әріптестікті нығайтудағы орасан зор еңбегін ерекше атап өтті.

– Бауырлас Түркіменстанның барлық ірі жетістіктері, ауқымды жаңғырулары мен халықаралық аренадағы беделінің артуы Сіздің атыңызбен тығыз байланысты, – деді Өзбекстан Президенті.

Түркіменстанда экономика тұрақты өсіп, халықтың әл-ауқаты үздіксіз жақсаруда. Мемлекет басшысы Түркімен халқының ұлттық көшбасшысы тарапынан ұсынылып жатқан жаһандық қауіпсіздік пен орнықты даму жолындағы халықаралық бастамаларды да ерекше атап өтті.

Осы орайда, Гурбангулы Бердімұхамедовтің 2025 жылды «Бейбітшілік пен сенім жылы» деп жариялау жөніндегі ұсынысы халықаралық деңгейде кең қолдау тапқаны айтылды.

Түркіменстан көшбасшысының жеке күш-жігерінің арқасында бүгінде Өзбекстан мен Түркіменстан арасындағы қарым-қатынастар жоғары деңгейге көтеріліп, шын мәнінде үлгілі сипатқа ие болғаны атап өтілді.

– Сіздің қолдауыңызбен 2017 жылы мемлекеттеріміз арасындағы стратегиялық әріптестіктің берік іргетасы қаланды, – деді Шавкат Мирзиёев.

Екі елдің парламенттері, үкіметтері, өңірлері, кәсіпкерлері, қоғам өкілдері, зиялы қауым мен жастар арасында белсенді диалог орнағаны, сауда-экономикалық ынтымақтастыққа бағытталған бағдарламалар мен жобалар жүзеге асып жатқаны айтылды. Мәселен, соңғы жылдары өзара тауар айналымы бірнеше есе артып, 1 миллиард доллардан асты.

Мәдени-гуманитарлық ынтымақтастық та жоғары бағаға лайық. Мысалы, өткен жылы Ашхабад пен Ташкентте Мақтымқұлы шығармаларының өзбек тіліндегі жинағының тұсаукесері өтті, сондай-ақ Ашхабадтағы халықаралық кинофестивальде өзбек-түркімен көркем фильмінің премьерасы ұйымдастырылды.

Гурбангулы Бердімұхамедовке Өзбекстан Республикасының жоғары наградасының табыс етілуі – көпұлтты халқымыздың көрнекті мемлекет қайраткері, қазіргі Түркіменстанның ұлттық көшбасшысы және сәулетшісі ретінде оған деген шынайы құрметі мен ілтипатының жарқын көрінісі болғаны айтылды.