Бүгінде республикада алғашқы медициналық-санитарлық көмекті халықаралық тәжірибеге сүйене отырып, халыққа барынша жақындатуға бағытталған жаңа үлгіні енгізуге ерекше көңіл бөлінуде. Осы негізде көпсалалы орталық емханалар, отбасылық дәрігерлік орындар мен отбасылық емханалар, махалла медициналық пункттері бірыңғай тәсіл аясында дамытылып жатыр.
Осының арқасында отбасылық дәрігерлердің үлесін 70 пайызға жеткізу жоспарланған. Цифрландыру мен қағаз құжат айналымын қысқарту арқылы медицина қызметкерлерінің жүктемесін үштен біріне азайту, халықтың алғашқы буын қызметтеріне қанағаттану деңгейін 85 пайыздан асыру көзделіп отыр. Сонымен қатар, медицина қызметкерлерін материалдық ынталандырудың олардың кәсіби тиімділігіне тікелей байланысты жаңа жүйесі енгізілуде.
Мемлекет басшысы мамандандырылған көмекті түбегейлі жетілдірудің маңыздылығын атап өтті. Өзбекстанда ондаған ғылыми-тәжірибелік медициналық орталықтар бар, олар заманауи құрал-жабдықтармен жабдықталуда және бюджеттен қомақты қаражат бөлінуде.
Сонымен бірге, халық арасында қызмет сапасы мен ұзақ кезек мәселесіне қатысты наразылықтар сақталып отыр. Мамандандырылған орталықтарда емдеудің халықаралық стандарттарын енгізу, алғашқы буында әдістемелік жұмыстардың баяу жүріп жатқаны айтылды.
Сондықтан барлық республикалық мамандандырылған клиникалардың қызметін қайта қарап шығып, олардың басқаруына заманауи кәсіби менеджерлерді тарту ұсынылды. Түркиялық мамандар еңбек етіп жатқан Республикалық онкология және радиология орталығы бұған жарқын мысал бола алады.
Қазіргі уақытта клиникалық протоколдарды қайта қарау және жаңарту жалғасуда: бүгінгі күнге дейін 400-і қайта қаралды, жыл соңына дейін бұл көрсеткіш екі есе артады. Азия даму банкінің қолдауымен үш мыңнан астам медициналық қызмет үшін тарифтер әдістемесі жасалуда.
Мемлекет басшысы тағы бес орталыққа шетелдік кәсіби менеджерлерді тарту немесе оларды шетелдегі беделді клиникалардың басқаруына беру мүмкіндігін зерделеуді тапсырды.
Бұл ретте халықаралық тәжірибеге негізделген диагностика мен емдеу стандарттарын әзірлеу, ұлттық клиникалық протоколдарды қалыптастыру, жаңа технологияларды енгізу, орталықтарды дамыту бойынша ұзақ мерзімді стратегия жасау, жоғары білікті мамандарды тарту, халыққа сапалы медициналық көмек көрсетудің ашық әрі әділ жүйесін құру қажеттігі атап өтілді.
Жиында балалар денсаулығын қорғау шаралары да талқыланды.
Әлемде балаларды ана сүтімен қоректендіру мәселесі өзекті болып, ана сүтінің орнына басқа өнімдерді пайдалану деңгейі артып келе жатқаны айтылды.
2030 жылға дейін Дүниежүзілік денсаулық сақтау ұйымы ұсынған көрсеткішке – алты айға дейінгі балалардың 70 пайызы тек ана сүтімен қоректенуіне қол жеткізу мақсатында республикада ана сүтімен қоректендіруді қолдау ұлттық бағдарламасы бекітіледі.
Бағдарлама аясында ДДСҰ мен ЮНИСЕФ-тің «Ана сүтімен қоректендіруге қолайлы жағдай жасайтын медициналық мекеме» және «Ана сүтімен табысты қоректендіруге 10 қадам» бастамалары енгізіледі. Медицина қызметкерлерін ана сүтімен қоректендіру бойынша оқыту, жүкті әйелдер мен аналардың білімін арттыру іс-шаралары өтеді.
Заңнамаға ана сүтінің орнын басатын өнімдердің жарнамасын шектеуге бағытталған өзгерістер енгізу, сондай-ақ балаларға арналған азық-түлік өнімдерін өндіру, импорттау және экспорттау, тасымалдау, сақтау, сату және жеткізуге қатысты талаптар мен стандарттарды жетілдіру ұсынылды.
Мемлекет басшысы ұсынылған бастамаларды қолдап, медицинаны халыққа жақындату және сапасын арттыру, жұқпалы емес аурулардан болатын өлімді азайту, жас ұрпақ денсаулығын нығайту бойынша бірқатар тапсырмалар берді.
