Өзбекстан Республикасы Президентінің 2023 жылғы 10 қазандағы жарлығына сәйкес, жол саласында басқару жүйесі жетілдіріліп, жолдарды салу, жөндеу және күтіп ұстау бойынша көпжылдық міндеттер белгіленген еді. Соңғы екі жылда осы мақсатқа 26 триллион сум бөлініп, жалпы 40 мың шақырым жол және 540 көпір жөнделген. Бұл салаға тартылған шетелдік қаржы көлемі де үш есеге артты.
Дегенмен, әлі де шешімін табатын істер көп. Биыл 7 мың шақырым жалпы пайдаланудағы жол мен 231 көпірді салу және жөндеу, 13 мың шақырым топырақ көшеге шағал төсеу, 400 шақырым цемент жабынды жол салу, магистральдар бойында 72 сервистік кешен ұйымдастыру жоспарланған.
Таныстырылымда жауапты мамандар осы жұмыстар бойынша ақпарат берді.
Жаңа жобаларды жоспарлау кезінде жолдардың қазіргі жағдайы мен көлік қозғалысының тығыздығы ескерілуде. Қазіргі кезде халықаралық қаржы ұйымдарымен бірлесіп, 1 200 шақырым жолды қайта жаңарту бойынша 6 ірі жоба жүзеге асырылуда.
Жақында тағы 4 жоба басталмақ. Атап айтқанда, «Төрткөл» мен «Беруний» қалаларын айналып өтетін А-380 автожолын қайта жаңарту, Қарақалпақстан мен Хорезмде 516 шақырым жергілікті жолды толық жөндеу, Термез – Денау және Сырдария – Бахт бағыттарындағы жолдарды цемент-бетон жабындымен салу көзделген. Бұл жобаларды қаржыландыруға Азия даму банкі, Дүниежүзілік банк, Ислам даму банкі және Азия инфрақұрылымдық инвестициялар банкі қаражаты тартылмақ.
Президент жолдарды сапалы күтіп ұстау – ең маңызды мәселе екенін айтты. Сондай-ақ, жол бойындағы инфрақұрылымды дамыту, халыққа ыңғайлы жағдай жасау жөнінде тапсырмалар берілді.
«Қамчиқ» асуында стационарлық бақылау бекеті іске қосылды. Осындай бекеттерді жүк ағыны жоғары басқа жолдарда да орнату қажеттігі айтылды.
Сонымен бірге, осыдан 20 жыл бұрын қабылданған «Автокөлік жолдары туралы» заң қазіргі заман талаптарына сәйкес келмейтіні, соңғы жылдардағы реформалар мен өзекті мәселелер онда көрініс таппағаны айтылды.
Сол себепті заңның жаңа редакциясы әзірленіп жатыр. Онда «Автокөлік жолдарын жоспарлау» тәртібін енгізу, жол инфрақұрылымын халық пен экономиканың өсіп жатқан сұранысына сай дамыту, жобалау кезінде тұрғындардың пікірін және қоршаған ортаға әсерін ескеру, жаяу жүргіншілерге қолайлы орта қалыптастыру, жол бойына коммуникациялар тарту кезінде бұрынғы жағдайын қалпына келтіру шығындарын жабу тәрізді талаптар қарастырылуда.
Сондай-ақ, ақылы жолдарды пайдалану ережелері, жол жиегінде сервис нысандарын орналастыру талаптары және ірі көлемді, ауыр салмақты көліктердің қозғалысын реттеу мәселелері де қамтылады.
Тұсаукесерде жауапты мамандар балама жолдар салу бойынша мемлекеттік-жекеменшік әріптестік негізіндегі жобалар жөнінде де есеп берді.
