Уч кундирки, Қорақалпоғистон Республикасининг Нукус туманидаги Ёшлар овози фестивали ўтказилаётган махсус павильон, эрта тонгдан то ярим тунгача журналист, блогерлар, ҳакамлар ҳайъати аъзолари, иштирокчи ёшлар, уларнинг устозлари ва яқинлари билан гавжум.
“Boʼzatov FEST” Ёшлар овози фестивалининг республика босқичи айнан шу масканда бўлиб ўтмоқда .
13 май куни эстрада йўналишида бўлиб ўтган танловнинг навбатдаги йўналиши, янада шиддатли ва ёрқин хотираларга бой тарзда якунланди.
- Маълумотларга қараганда, руҳ инсон вужудига мусиқа воситаси орқали киритилган экан. Балки, шунинг учун ҳам ҳузурбахш мусиқа ва қўшиқни тинглаганда руҳимиз ором олиб, кайфиятимиз кўтарилар. Ёқимли қўшиқ эса, бир оз бўлсада ташвишларни унутишга, ҳаётга ишонч ва завқ-шавқ билан қарашга ёрдам беради. Бугун, бу саҳнада куйлаётган ёшларнинг қўшиқларини эшитиб, бу ерда танлов эмас, иқтидорли эстрада хонандаларининг гала концерти бўляпти-ми деган хаёлга бориш ҳеч гап эмас. Ушбу танлов, ёш юлдузларни аниқлаб олиш билан бирга, унда қатнашаётган ҳар бир кишига маънавий куч ва шижоат ҳам бағишлайди. Фестивални, маънавият сарчашмаси гулдастаси ҳам дейиш мумкин.
Ҳа, танловнинг учинчи куни, чиндан ҳам эсда қоладиган даражадаги катта концерт дастурига айланиб кетди. Юртимизнинг турли ҳудудларидан келган 40 нафар, 10 ёшдан 30 ёшгача бўлган қатнашчилар эстрада йўналишида ўз иқтидорларини намойиш қилдилар. Танлов иштирокчиларининг қўшиқларини тинглар эканмиз, ҳақиқий овоз эгаларини айнан шу ерда кашф этгандек бўлдик. Айниқса Сирдарёнинг Гулистон шаҳридан ташриф буюрган иштирокчи, 15 ёшли Лайло Шарофиддинованинг ширали овозида янграган қўшиқни жон қулоғимиз билан тинглар эканмиз, қўшиқнинг инсон онги ва ҳиссиётига таъсир этишнинг ажойиб кучи унинг руҳий жараёнларга ҳамоҳанглигини янада теранроқ англагандек бўлдик.
- Мен, танловнинг маҳалла, сектор, туман, шаҳар ва вилоят босқичларидан ўтиб, Республика босқичига етиб келгунча устозларим кўмагида тинмай изланишга ҳаракат қилдим. Қўшиқ айтиш эса жону дилим. Машҳур Америка эстрада юлдузи Уитни Хюстоннинг "I have nothing“ ва Ўзбекистон халқ артисти Юлдуз Усмонованинг «Дунё» қўшиқларини ижро этдим. Фестивалда ғолиб бўлишга аҳд қилганман. Зеро, Президентимиз биз ёшларга шунчалар имконият яратиб бериб, ишонч билдирган экан, ўз интилишларимиз билан ишончни оқлашимиз ва шунга яраша жавоб беришимиз шарт. Агар ғолиб бўлсам, ишончни тўла оқлаган бўламан ва янада юксак марраларни эгаллаш учун интиламан. Мабодо ўрин ололмасам, унда, икки карра меҳнат қиламан ва келгуси йили албатта ғолиб бўламан!
Гуличеҳра ДУРДИЕВА,
«Янги Ўзбекистон» мухбири
Анвар ТУЙЧИЕВ олган суратлар
