Бу ҳақда ФВВ матбуот хизмати хабар берди.

Қайд этилишича, шу йилнинг 5 апрель куни Чилонзор туманида жойлашган «Бешқўрғон» бозорида содир бўлган ёнғиндан сўнг, бозор атрофидаги объектларда текширув ўтказилди.

Тошкент шаҳар Фавқулодда вазиятлар бошқармаси томонидан амалга оширилган текширувлар давомида автомобилларга ёқилғи қуйиш шохобчаси ҳамда яқинда жойлашган савдо комплексида қатор қўпол қоидабузарликлар аниқланди.

Жумладан, ёқилғи сақлаш сиғимига жуда яқин масофада жойлашган бинодан омборхона сифатида фойдаланилаётгани, шунингдек, савдо комплексидаги автоматик ёнғин ўчириш тизими носоз ҳолатда экани маълум бўлди.

Аниқланган камчиликлар сабаб, барча қоидабузарликлар тўлиқ бартараф этилгунга қадар мазкур объектларнинг фаолияти вақтинча тўхтатилди.

Мутасаддилар тадбиркорларни ёнғин хавфсизлиги қоидаларига қатъий риоя қилишга чақирмоқда. Қайд этилишича, хавфсизлик талабларига амал қилмаслик оғир оқибатлар ва йирик фожиаларга олиб келиши мумкин.