Тошкент шаҳар ИИББ маълум қилишича, 11 июнь куни соат 21:34 атрофида 1982 йилда туғилган Р.Ю. бошқарувидаги Cobalt автомашинаси Яккасарой туманидаги Шота Руставели кўчасида йўл ҳаракати қоидаларини бузган ҳолда ҳаракатланган. Қайд этилишича, мазкур шахс руҳий-асаб касалликлари шифохонасида рўйхатда туради.

Ҳудудда хизмат олиб бораётган ички ишлар органлари ходимларининг тўхташ ҳақидаги қонуний талабларига бўйсунмаган ҳайдовчи ҳаракатни давом эттириб, бир нечта транспорт воситасига техник шикаст етказган.

Тезкор чора-тадбирлар натижасида бошқа фуқароларга зарар етказилишининг олдини олиш мақсадида ИИО ходимлари табель қуролидан фойдаланган. Огоҳлантиришдан сўнг автомашина ғилдирагига ўқ узилиб, транспорт воситаси тўхтатилган ва ҳайдовчининг кейинги ноқонуний ҳаракатларига чек қўйилган.

Ҳозирда ҳолат юзасидан Тошкент шаҳар ИИББ томонидан терговга қадар текширув ўтказилмоқда. Текширув натижалари бўйича қўшимча маълумот берилиши маълум қилинди. Мазкур ҳолат Тошкент шаҳар ИИББ раҳбарияти назоратига олинган.