NordPass паролни бошқариш компанияси киберхавфсизлик бўйича мустақил тадқиқотчилар билан ҳамкорликда 2021 йилда тез-тез ишлатилган 200 та парол рўйхатини тузди. Бунинг учун 50 мамлакатдан 4 терабайтлик маълумотлар базаси ўрганилди.
Бу йил энг оммабоп парол эслаб қолиш осон бўлган “123456” рақамлар комбинацияси бўлди. Ундан 103 миллион мартадан ортиқ фойдаланилган. Иккинчи ўринни худди шунинг узунроқ версияси бўлган “123456789” эгаллади. У 46 миллион марта қўлланилган. Учинчи ўрин 32 миллиондан ортиқ киши ишлатган “12345” пароли эгаллади.
Биринчи ўнликка қуйидаги пароллар ҳам киритилган:
“qwerty”, “password”, “12345678”, “111111”, “123123”, “1234567890”, “1234567”.
“Aфсуски, пароллар заифлашмоқда ва одамлар ҳали ҳам парол гигиенасига риоя қилмаяпти”, деди NordPass бош директори Йонас Карклис.
Қизиғи, бу паролларни бузиш учун хакерга атиги бир сония вақт керак бўлади. Бироқ, машҳурлик бўйича 54-ўринни эгаллаган “myspace1” паролини бузиш хакернинг максимал уч соат вақтини олади.
“Пароллар рақамли ҳаётимизга кириш эшиги эканлигини тушуниш ва биз интернетда кўпроқ вақт ўтказаётганимиз сари киберхавфсизлик қоидаларига риоя қилиш ниҳоятда муҳим бўлиб бормоқда”, деди Карклис.
Компания маълумотларига кўра, кўплаб фойдаланувчилар ўз номини парол сифатида ҳам ишлатишади. Ferrari ва Porche эса парол сифатида ишлатиладиган энг машҳур автомобил брендлари экан.
2021 йилда “dolphin” (“дельфин”) ҳайвонлар билан боғлиқ пароллар орасида энг оммабопи бўлди. Британиянинг One Direction болалар гуруҳининг номи мусиқачилар орасида энг кўп қўлланилган паролга айланди. TengriMIX хабарига кўра, футбол билан боғлиқ энг машҳур парол “Ливерпул” футбол клубининг номи эканлиги аниқланди.
