Мажлисда Сенатнинг йигирма учинчи ялпи мажлисида муҳокама қилиниши назарда тутилган масалалар дастлабки тарзда кўриб чиқилди. Хусусан, «Географик кўрсаткичлар тўғрисида»ги Ўзбекистон Республикаси Қонуни муҳокама қилинди.
Қайд этилганидек, географик кўрсаткич, қоида тариқасида, ишлаб чиқарилаётган товарни белгилаш учун номи қўлланиладиган мазкур географик объектда жойлашган бир нечта юридик ёки жисмоний шахсларнинг талабномасига биноан рўйхатдан ўтказилиши мумкинлиги, истисно тариқасида эса, бошқа манфаатдор шахслар бўлмаган тақдирда битта юридик ёки жисмоний шахс томонидан рўйхатдан ўтказишга доир талабнома бериш мумкинлиги белгиланмоқда.
Мазкур Қонуннинг ҳаётга татбиқ этилиши натижасида ўзининг ноёб маҳсулоти учун белгини рўйхатдан ўтказишни хоҳловчи ишлаб чиқарувчилар сони кўпайишига, энг асосийси минтақавий брендлар ривожланишига эришилади. Бу эса, географик кўрсаткич билан ҳимояланадиган қўшимча қийматга эга ишлаб чиқарувчилар маҳсулотининг маҳаллий ва хорижий бозорларга чиқишига имкон яратади.
Тадбирда «Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги Ўзбекистон Республикаси Қонуни ҳам муҳокама қилинди.
Бугунги кунда «прописка» сўзи маънавий эскирганлиги ва ушбу атама фуқаролар онгида «тўсқинлик қилувчи», «эркинликни чекловчи» деган тушунчаларни келтириб чиқармоқда.
Шу боис мавжуд муаммо ва камчиликларни, доимий прописка билан боғлиқ муносабатларни тартибга соладиган қонун ҳужжатларидаги бўшлиқларни бартараф этиш мақсадида, шунингдек амалда бўлган биометрик паспорт билан боғлиқ янги ҳуқуқий муносабатлар жорий этилганлиги боис мазкур Қонунни қабул қилиш зарурати туғилди.
Хусусан, Қонун билан қонун ҳужжатлардаги «доимий прописка қилиш» ва «турган жойи бўйича ҳисобга олиш» тушунчаларини «доимий яшаш жойи бўйича рўйхатга олиш» ва «вақтинча турган жойи бўйича рўйхатга олиш» тушунчаларига алмаштириш, Ўзбекистон Республикасининг фуқаролигига мансуб эмаслик тўғрисидаги маълумотномани расмийлаштирганлик учун давлат божи белгилаш ва фуқаро ID-картани яроқсиз ҳолга келтирганда ва йўқотиб қўйган тақдирда бу ҳақида тегишли идорага ўз вақтида мурожаат қилмаса, маъмурий жавобгарлик белгилаш назарда тутилмоқда.
Шунингдек, мажлисда адлия вазирининг 2021 йилда давлат органлари ва ташкилотларининг норма ижодкорлиги фаолияти ва ҳуқуқни қўллаш амалиётининг ҳолати тўғрисидаги ахбороти муҳокама қилинди.
2021 йилда Адлия вазирлиги томонидан бир қатор ижобий ишлар амалга оширилганлиги, бироқ давлат органлари ва ташкилотларининг норма ижодкорлиги фаолияти ҳамда ҳуқуқни қўллаш амалиёти соҳасида ўз ечимини кутаётган муаммолар борлиги ва уларни бартараф этиш чораларини кўриш зарурлиги таъкидланди.
Жумладан, ҳудудий давлат органларига услубий кўмак кўрсатиш орқали уларнинг мазкур йўналишдаги фаолияти самарадорлигини ошириш чораларини кўриш, норматив-ҳуқуқий ҳужжат қабул қилган орган билан амалий ҳамкорликни кенг йўлга қўйиш зарурлиги айтиб ўтилди.
Вазирликлар, давлат қўмиталари ва идоралар, маҳаллий давлат ҳокимияти органларининг норматив-ҳуқуқий ҳужжат лойиҳасини ҳуқуқий, гендер-ҳуқуқий ва коррупцияга қарши экспертизалардан ўтказишда Коррупцияга қарши курашиш агентлиги ва бошқа тегишли идоралар билан ҳамкорликни йўлга қўйиш, ҳар бир экспертиза хулосаларини вазирликнинг расмий веб-сайтига жойлаштириш муҳим масала эканлиги таъкидланди.
Бундан ташқари, Қўмита мажлисида Ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастурида белгиланган вазифалар ижроси юзасидан Вазирлар Маҳкамасининг ҳисоботи ҳам муҳокама қилинди.
Давлат дастурининг 11-бандидаги кам таъминланган ва бошқа ижтимоий ҳимояга муҳтож бўлган фуқароларга бепул юридик ёрдам кўрсатишни ҳамда давлат ҳисобидан юридик ёрдам кўрсатадиган адвокатларни электрон танлаш тизимини жорий этишни назарда тутувчи «Бепул юридик ёрдам тўғрисида»ги қонун лойиҳасини ишлаб чиқиш, Коррупцияга қарши курашиш агентлиги фаолияти ҳуқуқий асосларини такомиллаштириш, коррупцияга қарши ички назорат тизими («комплаенс-назорат») ҳуқуқий асосларини яратиш ҳамда коррупцияга қарши курашишнинг воситаларини такомиллаштириш ва Коррупцияга қарши курашиш бўйича 2021—2025 йилларга мўлжалланган миллий стратегияни ишлаб чиқиш билан боғлиқ бир қатор вазифалар белгиланган муддатда бажарилмаганлиги танқид қилинди.
Мажлис якунида Қўмитанинг тегишли қарори қабул қилинди, деб хабар беради Ўзбекистон Республикаси Олий Мажлис Сенати матбуот хизмати.
