Мулоқотда икки томонлама ўзаро ҳамкорликни кенгайтириш, шу жумладан, парламентлараро алоқаларни мустаҳкамлаш масалалари кўриб чиқилди. Ўзбекистон Республикаси Президентининг АҚШга амалга оширган ташрифи натижасида икки давлат ўртасидаги муносабатлар стратегик шерикликнинг янги босқичига кўтарилгани қайд этилди.
Суҳбат чоғида мамлакатимизда амалга оширилаётган чуқур ўзгаришлар ва кенг кўламли ислоҳотларга юқори баҳо берилди. Америка делегацияси раҳбари АҚШ Вакиллар палатаси президенти Ненси Пелосининг самимий тилакларини етказди.
Шунингдек, Ўзбекистон ва АҚШ парламенти аъзолари ўртасидаги алоқаларни мустаҳкамлаш ва кенгайтириш истиқболлари муҳокама қилинди. Шу маънода «Ўзбекистон бўйича кокус» (дўстлик гуруҳи)нинг ижобий ўрни ва фаолиятининг самарадорлиги таъкидлаб ўтилди. Конгресс аъзолари Ўзбекистонга нисбатан «Жексон-Веник» тузатишининг бекор қилинишига кўмак беришга тайёр эканликларини изҳор этишди.
Конгрессменлар мажбурий меҳнат ва одам савдосининг олдини олиш бўйича олиб борилаётган ислоҳотларга катта қизиқиш билдиришди.
Шунингдек, сиёсий, савдо-иқтисодий, ижтимоий, маданий-гуманитар ҳамкорликни ривожлантириш, аёллар тадбиркорлиги ҳамда хотин-қизларнинг жамиятдаги ролини кучайтириш, гендер тенгликни таъминлаш борасида фикр алмашилди.
Томонлар ўзларини қизиқтирган бошқа масалаларни ҳам муҳокама қилишди.
Ўзбекистон Республикаси
Олий Мажлиси Сенатининг
ахборот хизмати
