Профессор Бали Пулендран раҳбарлигидаги илмий гуруҳ томонидан амалга оширилган ушбу янгилик тиббиёт оламида сўнгги 200 йил давомида вакциналар яратилиш тамойилини бутунлай ўзгартириб юбориши мумкин бўлган кескин бурилиш сифатида баҳоланмоқда.
Одатда вакциналар маълум бир касалликка, масалан, қизамиқ ёки сувчечакка қарши курашиш учун организмни махсус ўргатади. Аммо «Сcиэнcэ» журналида тасвирланган Стэнфорд олимларининг янги ёндашуви иммунитет тизимини шунчаки «машқ қилдирмайди», балки иммун ҳужайраларининг ўзаро алоқа қилиш усулини тақлид қилади. Бурун спрейи кўринишидаги дори ўпкадаги макрофаг деб аталувчи оқ қон ҳужайраларини доимий шай ҳолатга келтириб қўяди. Натижада, организмга қандай инфекция киришга уринмасин, иммунитет тизими уни дарҳол қайтаришга тайёр туради.
Ҳайвонларда ўтказилган тажрибалар давомида ушбу ҳимоя эффекти қарийб уч ой давом этган. Олимларнинг таъкидлашича, бундай юқори шайлик ҳолати вирусларнинг ўпка орқали организмга киришини 100 дан 1000 бараваргача камайтирган. Профессор Пулендраннинг сўзларига кўра, ушбу универсал вакцина нафақат грипп ёки CОВИД-19, балки деярли барча маълум вируслар, бактериялар ва ҳатто аллергенларга қарши кенг қамровли ҳимояни таъминлайди.
Тадқиқот шуни кўрсатдики, янги усул уй чанги оқибатида келиб чиқадиган аллергик астма қўзғалишини ҳам камайтиради. Оксфорд университети экспертлари бу янгиликни «ҳақиқатан ҳам ҳаяжонланарли» деб аташмоқда. Агар инсонларда ўтказиладиган клиник синовлар ҳам муваффақиятли якунланса, бу ихтиро нафас йўллари касалликларига қарши курашда инқилобий қадам бўлади ва мавсумий касалликлар юкини сезиларли даражада енгиллаштиради.
