Учрашувда «Evergreen Motors Group» корпорациясининг Ўзбекистондаги директори Ванг Джун Хо ҳамда шаҳар ҳокимлигининг мутасадди ходимлари иштирок этди.
Тадбирда Бекобод шаҳрида саноат тармоқлари ривожланганига эътибор қаратилиб, бу ерда «Ўзметкомбинат» АЖ, «Бекободсемент» АЖ, «Бекобод синтекс» МЧЖ, «Бекободсемтаъмир» ва бошқа йирик корхоналар фаолият юритиши тўғрисида маълумот берилди. Шунингдек, шаҳарда инвесторлар учун яратилган имкониятлар, мавжуд инфратузилма, кичик саноат ва эркин иқтисодий зоналарда ишлаб чиқаришни ташкил этиш афзалликлари ҳамда шаҳар ҳокимлиги балансида бўлган бўш ер майдони, бино ва иншоотларни тадбиркорлик фаолиятини юритиш мақсадида ажратиш тартиблари тушунтирилди.
КЎБУ вакиллари ҳудудда биргаликда саноат маҳсулотлари ишлаб чиқаришни йўлга қўйиш, Жанубий Кореянинг нуфузли университетларидан бирининг филиалини очиш масаласини ўрганиш бўйича таклифи билдирди.
Ким Чанг Кеон қабул учун ўз миннатдорлигини изҳор этиб, Ўзбекистонга ташрифдан кўзланган мақсад Корея Республикасидан инвестициялар ва илғор технологияларни республикага, шу жумладан вилоят ва шаҳарларга жалб этишга кўмаклашишдан иборат эканини билдирди. Айниқса, мактабгача таълим муассасаларини ташкил этиш, соғлиқни сақлаш соҳасидаги ҳамкорликни ривожлантириш, саноат маҳсулотлари ишлаб чиқариш бўйича қўшма лойиҳалар амалга оширишда иштирок этишга қизиқиш катталиги маълум қилинди.
Ким Чанг Кеон икки мамлакат ўртасидаги алоқаларнинг бугунги ҳолатига ижобий баҳо бериб, ушбу жараёндаги иштирокни фаоллаштириш учун Бекобод шаҳрига Жанубий Кореядан малакали тиббиёт мутахассисларини жалб этиш ва жарроҳлик операциялари ўтказишда ҳам кўмаклашиш истагида экани ҳақида сўз юритди.
Учрашувда томонлар келишилган йўналишлар бўйича музокараларни видеоконференцалоқа орқали давом эттириш ва янги инвестиция лойиҳаларни амалга ошириш бўйича фикр алмашди, деб хабар беради «Дунё» АА.
