Мазкур ҳолат юзасидан Навоий вилояти ИИБ томонидан тезкор текширув ишлари олиб борилди. Аниқланишича, ушбу воқеа жорий йилнинг 7 апрель куни Навоий шаҳри «Янгиариқ» маҳалласида жойлашган, фуқаро С.С. раҳбарлигидаги хусусий мактабгача таълим муассасасида содир бўлган.

Текширувлар давомида маълум бўлишича, ушбу муассасада тарбиячи бўлиб ишлаб келаётган, 2003 йилда туғилган фуқаро Е.Н. ўз қарамоғидаги гуруҳ болаларини гўёки «тартибга солиш» мақсадида уларга нисбатан зўравонлик ишлатган.

Шунингдек, ўрганишлар жараёнида гумонланувчи жорий йил март ойидан апрель ойига қадар бўлган даврда қарамоғидаги, ўзини ҳимоя қилиш имконияти чекланган болаларга нисбатан мунтазам равишда куч ишлатиб келгани маълум қилинди.

Мазкур ҳолат юзасидан Е.Н.га нисбатан Навоий шаҳар ИИБ ҳузуридаги Тергов бўлими томонидан Ўзбекистон Республикаси Жиноят кодексининг 110-моддаси 2-қисми билан жиноят иши қўзғатилиб, у процессуал тартибда гумонланувчи сифатида ушланган.

Ҳозирда дастлабки тергов ҳаракатлари олиб борилмоқда. Тергов якунларига кўра айбдор шахсларга нисбатан қонуний қарор қабул қилиниши таъминланади.