Mazkur holat yuzasidan Navoiy viloyati IIB tomonidan tezkor tekshiruv ishlari olib borildi. Aniqlanishicha, ushbu voqea joriy yilning 7 aprel kuni Navoiy shahri «Yangiariq» mahallasida joylashgan, fuqaro S.S. rahbarligidagi xususiy maktabgacha ta’lim muassasasida sodir bo‘lgan.

Tekshiruvlar davomida ma’lum bo‘lishicha, ushbu muassasada tarbiyachi bo‘lib ishlab kelayotgan, 2003 yilda tug‘ilgan fuqaro Ye.N. o‘z qaramog‘idagi guruh bolalarini go‘yoki «tartibga solish» maqsadida ularga nisbatan zo‘ravonlik ishlatgan.

Shuningdek, o‘rganishlar jarayonida gumonlanuvchi joriy yil mart oyidan aprel oyiga qadar bo‘lgan davrda qaramog‘idagi, o‘zini himoya qilish imkoniyati cheklangan bolalarga nisbatan muntazam ravishda kuch ishlatib kelgani ma’lum qilindi.

Mazkur holat yuzasidan Ye.N.ga nisbatan Navoiy shahar IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 110-moddasi 2-qismi bilan jinoyat ishi qo‘zg‘atilib, u protsessual tartibda gumonlanuvchi sifatida ushlangan.

Hozirda dastlabki tergov harakatlari olib borilmoqda. Tergov yakunlariga ko‘ra aybdor shaxslarga nisbatan qonuniy qaror qabul qilinishi ta’minlanadi.