Мулоқотда делегация аъзоларига мамлакатимизда кейинги йилларда амалга оширилаётган кенг кўламли ислоҳотлар, пухта ўйланган, ўзаро манфаатли ва амалий ташқи сиёсатнинг устувор йўналишлари ҳақида сўзлаб берилди.
Учрашувда Олий Мажлис Қонунчилик палатаси ва Буюк Британия парламенти Лордлар палатаси ўртасидаги парламентлараро ҳамкорлик алоқаларини ривожлантириш, икки томонлама ҳамкорликни кенгайтиришда парламентлараро алоқаларни янада чуқурлаштириш масалалари муҳокама қилинди.
— Ўзбекистон Президенти ташаббуси билан Ёшлар парламентлари ташкил этилганини юқори баҳолайман, — дейди Элисон Сатти. — Бу ўз навбатида, қонун ижодкорлиги жараёнига кўпроқ ёшларни жалб қилиш, қонунларда ёшлар манфаатларини акс эттириш, ёшлар фаоллиги ва жамиятдаги иштирокини ривожлантиришда муҳим аҳамият касб этади. Мен Олий Мажлис Қонунчилик палатасининг мажлисида иштирок этиб, Ёшлар масалалари бўйича комиссия, Ёшлар парламентининг ахборотларини эшитиб, ўзим учун керакли бўлган бир қатор вазифаларни белгилаб олдим.
Дўстона ва самимий кечган учрашувда Ўзбекистон — Буюк Британия ҳамкорлигини янада кенгайтиришда парламентлараро алоқаларни чуқурлаштириш муҳимлиги яна бир бор қайд этилди, деб хабар беради Ўзбекистон Республикаси Олйи Мажлис Қонунчилик палатаси матбуот хизмати.
