Хусусан, 2021 йил 24 март куни Халқ депутатлари Фарғона вилояти ва туман-шаҳарлар Кенгашлари ҳузурида сенаторлар, депутатлар ва жамоат фаоллари, оммавий ахборот воситалари вакиллари ҳамда блогерлардан иборат «Халқпарвар» Жамоатчилик комиссиялари тузилди.
Президентимизнинг юқоридаги Фармонига асосан, қишлоқ жойларда кўп квартиралик уй-жойлар қурилишини амалга оширадиган тадбиркорлик субъектларини аниқлаш бўйича танлов савдоларини ўтказилади. Шаҳарларда кўп квартиралик уй-жойларни қуриш учун ер участкаларини «Е-IJRO AUKSION” ягона электрон савдо майдончасидаги электрон аукционга қўйилади. Туман-шаҳар ҳокимлиги томонидан маҳаллалар кесимида уй-жойга муҳтож фуқаролар рўйхатини шакллантирилади.
Куни-кеча Ўзбекистон Республикаси Олий Мажлиси Қонунчилик палатаси депутатлари Б.Раҳмоналиев ҳамда М.Ибрагимовалар Қувасой шаҳри ҳамда Қува туманларида бўлиб, аҳоли учун қурилаётган уй-жойлар билан танишдилар.
Ҳокимликлар томонидан уй-жойга муҳтож фуқаролар рўйхати шакллантирилгани, ипотека кредити ва субсидиялар олувчилар ўртасида маблағларни адолатли тақсимлаш борасидаги ишларни жойига чиққан ҳолда ўрганиб борилаётгани алоҳида таъкидланди.
Депутатлар дастлаб Қувасой шаҳридаги «Бунёдкор» йўлдош шаҳарчасидаги кўп қаватли уй-жойларда олиб борилаётган ишлар билан танишдилар.
Шундан сўнг Пакана МФЙ ҳудуди кичик саноат зонасидаги 2021 йил июнь ойида ишга тушиши режалаштирилаётган умумий қиймати 10 млн.АҚШ долларлик “TSEMENT TEXNO SERVIS” МЧЖнинг инвестиция лойиҳаси билан танишдилар. Ушбу лойиҳа орқали 320 нафар янги иш ўринларини яратиш белгиланган.
Сўнг депутатлар ҳарбийлар ва «Ватанпарвар» тизими ходимлари учун миллий қорабайир наслли отлар тайёрланадиган 2,5 гектар майдонда жойлашган, замонавий дренаж тизимига эга очиқ ва ёпиқ манежлар, солярий ва барча керакли жиҳозлар билан таъминланган «Водий тулпорлари» мажмуасига ташриф буюриб яратилган шарт-шароитлар билан танишдилар.
Таъкидландики, ҳудудларда кўп квартиралик уй-жойлар қурилиши тизимли равишда амалга оширилмоқда.
Ш.Тўхтаматов.
