Ижтимоий тармоқларда Озода Нурсаидова ва Муниса Ризаева ҳамда бошқа фаолларнинг модель Сабрина Жабборова билан учрашиб, суҳбатлашгани акс этган видео тарқалди.
Жабрланувчи Сабрина Жабборова унга моддий томонлама кўмак кўрсатиб, қўллаб-қувватлаётганларга миннатдорчилик билдирган.
«Жасмина, Ниҳола ва Муниса опалар икки кун давомида мен учун нафақат Туркия, балки дунё бўйлаб шифкорлар қидиришди. Охири Туркиядан мутахассис врачлар топиб, гаплашишди. Эртага (14 март назарда тутилмоқда — таҳр.) онам билан Туркияга учиб кетамиз. У ерда бизни Жасмина опа кутиб олади, шифохонага олиб боради. Биринчи текширув ўтказишади, кейин қанча пул кетишини ҳисоблашади. Ҳаммаси сиз халқимиз берган маблағ эвазига бўлади», — дейди жабрланувчи.
Ўзбекистонда хизмат кўрсатган артист Озода Нурсаидова кўп нарсадан бехабар бўлгани учун Сабринадан узр сўраган.
— Шу кунгача кўп нарсадан менинг хабарим йўқ эди. Операциядан кейин оёғи 7 сантиметрга калта бўлиб қолганини мен интернетга видео чиққанидан кейин билдим. Мен тўғриси реабилитация бўляпти, деб хурсанд бўлганман. Биламан, бу мени оқлайдиган вазият эмас. Мана ҳозир келиб, Сабринани кўрдим, вазиятдан тўлиқ хабардор бўлмаганим учун Сабринадан узр сўрайман. Уни эндиликда 2-3 босқичли операция қилиш керак экан. Халқимизга Сабринанинг соғлиғига бефарқ бўлмагани учун катта раҳмат дейман. Ўйлайманки, мушкул операциядан Сабрина эсон-омон ўтволади, дейди Озода Нурсаидова.
Муниса Ризаева Сабрина учун Туркиядан шифокор излаш жараёнида фаол иштирок этгани ҳақида сўзлаб берган.
— Туркияда кўп врачлар олмаймиз деди, лекин битта профессор олиб келинглар деди. Шундан сўнг биз Сабринанинг карта рақамини ўз саҳифаларимизда тарқатдик. Жуда кўп инсонлар картага қўлларидан келганича пул ташлашяпти. Картада ҳозир яхшигина сумма йиғилди. Ўша пуллардан биз Туркияга авиачипта олдик, Истанбулдан уй ижарага олдик, шифокорларни гаплашдик. Агар яна Сабринага кимдир ҳомийлик қилиб, ёрдам бермоқчи бўлса, биз хурсанд бўлардик, дейди Муниса Ризаева.
Эслатиб ўтамиз, аввалроқ Тошкент шаҳри ИИББ Озода Нурсаидованинг клипини суратга олиш жараёнида “Mercedes-Benz” модель Сабрина Жабборовадан ташқари клип жараёнида иштирок этаётган яна бир қизни ҳам уриб кетганини маълум қилганди.
