ЕЧЛнинг 2020 йилги финалчилари “Бавария” ва “ПСЖ” ўртасида Мюнхенда ўтган баҳс голларга бой бўлди. Ўйинда парижликлар Мбаппенинг дубли ва Маркиньоснинг голи эвазига ғалаба қозонишди. Жавоб голларни Шупо-Мотинг ва Мюллер киритди – 2:3.
Шу ўринда таъкидлаш жоизки, бу Флик бошчилигидаги мюнхенликларнинг ЕЧЛдаги илк мағлубиятидир.
“ПСЖ” ҳужумчиси Килиан Мбаппе ўйиндан кейин Bayern Germany нашри мухбирига қуйидагиларни айтди: “Дунёнинг энг яхши ўйинчиларига қарши майдонга тушишни яхши кўраман. Мануэл Нойер футбол тарихидаги энг яхши дарвозабонлардан бири. Унга Чемпионлар лигаси финалида гол уролмагандим, бугун бунга эришдим. Умид қиламанки, жавоб ўйинида ҳам голлар ураман.
Европанинг айни пайтдаги энг яхши жамоаси билан ўйнадик. Оғир ўйин. Яхши ҳаракат қилдик ва қийинчиликларни биргаликда енгдик. Аммо бу, ажойиб қарама-қаршиликнинг фақат биринчи қисми. Кейинги ўйинда ҳам ишончли ўйнаш ва жамоавий футбол намойиш этишимиз керак бўлади”.
Англиянинг “Челси” жамоаси Севильяда, нейтрал стадионда ўтган беллашувда “Порту” даррозасига жавобсиз 2та тўп киритди. Биринчи бўлимда Маунт, иккинчи бўлим сўнгида Чилуэлл гол урди.
“Оғир ўйин бўлди. Қийин дақиқаларни бошдан кечирдик, — деди ўйиндан сўнг “Челси” бош мураббийи Томас Тухел ВВС мухбирига. — Аммо буни тўғри қабул қилдик. Жамоа яхши кайфиятда эди, якунда ажойиб натижага эришдик”.
