Ҳужжатга кўра, Ўзбекистон Республикасининг айрим қонун ҳужжатларига коррупцияга оид жиноятлар учун жавобгарлик ва жазо чораларини такомиллаштиришга қаратилган қўшимча ва ўзгартишлар киритилиши назарда тутилмоқда.
Шунингдек, ёшларда коррупцияга нисбатан муросасиз муносабатни шакллантириш ёшларга оид давлат сиёсатининг асосий йўналишларидан бири сифатида белгиланиши таклиф этилмоқда.
Хусусан, Жиноят кодексининг саккизинчи бўлими «коррупцияга оид жиноятлар» атамаси билан тўлдирилиб, унда 19 турдаги жиноий қилмишлар коррупцияга оид жиноятлар сифатида белгиланмоқда.
Қонун лойиҳасида коррупция ҳақида хабар берган шахсларни рағбатлантириш ва ҳимоя қилишнинг ҳуқуқий кафолатларини кучайтириш ҳам кўзда тутилган. Жумладан, коррупцияга оид жиноят ҳақида асосли хабар берган шахсга нисбатан Коррупцияга қарши курашиш агентлигини олдиндан хабардор этмасдан интизомий жазо қўллашга йўл қўйилмаслиги белгиланмоқда.
Шу билан бирга, Жиноят кодексига ўзлаштириш ёки растрата йўли билан талон-торож қилиш, шунингдек фирибгарлик учун судланган ва етказилган зарарни тўлиқ қопламаган шахсларни жазодан муддатидан илгари шартли равишда озод этмасликни назарда тутувчи норма киритилмоқда.
Худди шундай қоида такроран ёки хавфли рецидивист томонидан, ёхуд жуда кўп миқдорда пора олиш, бериш ёки воситачилик қилиш учун судланган шахсларга нисбатан ҳам татбиқ этилади.
Бундан ташқари, ўзлаштириш ёки растрата йўли билан талон-торож қилиш ҳамда фирибгарликни мансаб мавқеини суиистеъмол қилиш ёки хизмат мавқеидан фойдаланиб содир этганлик учун жавобгарлик чоралари янада кучайтирилмоқда.
Қонун лойиҳаси қабул қилиниб, кўриб чиқиш учун Сенатга юборилди.
