Бунинг учун ҳукуматнинг махсус қарори ҳам қабул қилинган. Амалда эса, йиллар давомида мана шу чанг пули кутубхоначиларга тўланмай келган. Сожида Раҳмонованинг Учкўприк туман адлия бўлимига мурожаат қилишининг асосий сабаби ҳам шунда.
— Илгарилари «чанг пули» тўлаб берилган. Бироқ негадир сўнги йилларда бизларга берилган шу имтиёзли маблағ тўланмай қолди, — дейди Сожида Раҳмонова. — Чунки биласиз, минглаб эски ва янги китоблар сақланаётган кутубхоналарда чанг билан боғлиқ аллергик касалликлар келиб чиқиш эҳтимоли юқори. Дўстларимнинг маслаҳати билан туман адлия бўлимига мурожаат қилдим. Буни қарангки, мурожаатим қонуний ва ижобий ечим топди. 2021-2022 ўқув йиллари учун «чанг пули»ни тўлиқ олишга эришдик.
Холинса Турғунованинг дадаси Зухра исмини яхши кўргани учун уни ёшлигидан «Зухра» деб чақиради. Бу эса бутун маҳаллада одатга айланади. Йиллар ўтиб Тошкент вилоятидан Учкўприк туманига келин бўлиб келган Ҳолинса опанинг иккинчи исми ҳам ўзи билан бирга «келди». Бироқ йиллар ўтиб нафақага чиқишга ҳужжат тайёрлаш жараёнида ана шу икки исм билан боғлиқ муаммолар юзага чиқди. Туман адлия бўлимига мурожаат қилган Холинса опанинг муаммолари суд тартибида ижобий ўз ечимини топди.
— Дадам раҳматли Тохир ва Зуҳра фильмини жуда яхши кўрардилар. Шунинг учун мени ёшлигимда эркалаб негадир Зуҳра деб чақирган. Бу эса йиллар давомида оиламизда, қишлоқда одатга айланди, — дейди Холинса Турғунова. 1984-1997 йилларда ҳатто ҳужжатларга ҳам «Ҳолинса» эмас, «Зуҳра», деб ёзилган экан. Нафақага чиқишимда мана шундай ажойиб муаммоларга учрадим. Хайрият, адлия вакиллари мурожаатимни суд тартибида ижобий ҳал қилиб берди.
Адлия бўлимларининг энг асосий вазифаларидан бири — аҳолига ҳуқуқий кўмак бериш билан бирга, уларнинг ижтимоий ҳаётда бузилган ҳуқуқларини тиклаш ва қонунан амалий ёрдам беришдан иборат. Биргина Фарғона вилоятида жорий йилнинг ўтган даври мобайнида адлия органларига 5 мингдан ортиқ мурожаатлар келиб тушган ва жисмоний ва юридик шахсларга жами 4 миллиард сўмдан ортиқ пул маблағлари ундириб берилган.
Эътиборлиси, шу аризаларнинг 27 фоизи жойларда ташкил этилган сайёр қабуллар давомида иш юритувга қабул қилинган ва уларнинг қарийб 80 фоизи ижобий ҳал этилишига эришилган.
Элёржон Эксанов,
Фарғона вилоят адлия бошқармаси
жамоатчилик билан ишлаш бўйича
етакчи маслаҳатчиси.
