Уй-жой коммунал хизмат кўрсатиш вазирининг биринчи ўринбосари, “Ўзсувтаъминот” АЖ раҳбари Соҳиб Саифназаров Россиянинг етакчи “ЭР-Телеком” телекоммуникация компанияси вакиллари билан учрашув ўтказди. Бу ҳақида Уй-жой коммунал хизмат кўрсатиш вазирлиги ахборот хизмати хабар бермоқда.
Компания мутахассислари марказлашган ичимлик сув таъминоти жорий қилинмаган ҳудудларда сув етказиб бериш тизимини модернизация қилиш бўйича тақдимот ўтказишди. Хусусан, тизимни оптималлаштириш ва соҳага инновацион технологияларни жалб этиш орқали мавжуд ресурслар сарфини камайтириш, тармоқда юзага келиши мумкин бўлган техник носозликларга олдиндан ташхис қўйувчи ва олдини олувчи замонавий технологиялар бўйича маълумот берилган.
Музокаралар жараёнида, лойиҳанинг долзарблиги ва соҳага IT технологияларни тадбиқ этиш муҳимлиги инобатга олиниб, мамлакатимизнинг иккита туманида ушбу компаниянинг замонавий технологияларини қўллаган холда, бошланғич пилот лойиҳани инвестиция киритиш шарти билан амалга ошириш таклифи илгари сурилди.
