Кеча гуруҳ босқичидаги сўнгги тур ва ярим финал баҳслари бўлиб ўтди. Эътиборлиси, якунда икки нафар вакилимиз финал беллашувида Токио-2020 Олимпиада йўлланмаси учун кураш олиб бориш ҳуқуқини қўлга киритди.
Эркаклар ўртасида Зоҳид Кенжаев ярим финалда жаҳон рейтингида 46-ўринда турган қозоғистонлик Кирилл Герассименкони 4:3 ҳисобида доғда қолдирди. Энди унинг ҳал қилувчи беллашувдаги рақиби эронлик Нима Аламян бўлади.
Аёллар баҳсида эса икки нафар вакиламиз ярим финалда тўқнаш келишди. Римма Гуфранова ҳамда Марҳабо Магдиева тўқнашувида Магдиева 4:2 ҳисобида ғалаба қозонди. Унга финалда қозоғистонлик Анастассия Лаврова рақиблик қилади.
Эслатиб ўтамиз, регламентга кўра, квалификацион мусобақада ҳар бир минтақа ғолибларигина Олимпиада йўлланмасига эга чиқишади.
Токио-2020 лицензион мусобақаси финаллари:
Зоҳид Кенжаев – Нима Аламян (Эрон)
Марҳабо Магдиева – Анастассия Лаврова (Қозоғистон)
