БМТнинг Қочқинлар бўйича Олий комиссарлигининг Италиядаги вакили Филиппо Унгаронинг сўзларига кўра, қайиқда 92 – 97 нафаргача одам бўлган.
“Омон қолган 60 киши Лампедузадаги марказга олиб кетилди”, деди у.
Халқаро миграция ташкилоти вакили Флавио Ди Жакомонинг сўзларига кўра, фожиа 95 нафарга яқин муҳожир билан Ливиядан чиқиб кетган икки қайиқдан бири чўкиб кета бошлаганидан кейин содир бўлган. Барча одамлар бошқа қайиққа ўтказилган, юкламанинг ошиши туфайли қайиқ ағдарилиб кетган.
Муҳожирлар денгизда қанча вақт бўлгани ҳозирча номаълум. Лампедуза мэри Филиппо Маннинонинг айтишича, ҳалокат “эҳтимол тонгда” юз берган. Қутқарувчилар омон қолганларни қидиришда давом этмоқда.
Халқаро миграция ташкилоти маълумотларига кўра, Шимолий Африкадан жанубий Европага миграция йўли дунёдаги энг хавфли йўллардан бири саналади, сўнгги ўн йил ичида Ўрта ер денгизини кесиб ўтиш чоғида 24,5 мингга яқин одам ҳалок бўлган ёки бедарак йўқолган. Ҳалок бўлганларнинг аксарияти Тунис ва Ливиядан йўлга чиққан кичик қайиқдаги йўловчилардир, деб хабар берди kz.kursiv.media.
