Ишхоналарга боришга рухсат берилди, аммо кимнинг етиб олишга имкони бўлмаса, уйда масофадан ишлаши мумкин. Бу ҳақда мамлакатнинг бош вазири Борис Жонсон хабар берди. Унинг сўзларига кўра, карантинни бутунлай бекор қилишга ҳали эрта. Ҳукумат шунчаки чораларни юмшатмоқчи.
Мамлакатда миллионлаб одам коронавирусга чалинган. Лекин ҳукумат узоқ муддатли мажбурий ҳаракатсизлик иқтисодиётга, қолаверса аҳолининг руҳий ва жисмоний ҳолатига салбий таъсир кўрсатишидан кўпроқ ташвишда.
Мамлакатда беш босқичдан иборат коронавирус таҳдиди режими эълон қилинган эди. Карантин чораларини юмшатишнинг навбатдаги босқичида 1 июндан мактаблар ва савдо марказлари очилиши, июль ойидан эса меҳмонхоналар фаолиятига рухсат берилиши мумкин.
“Эпидемия чўққига чиқиб бўлди. Энди кўрсаткичлар аста-секин пасаймоқда. Аммо бу босқич энг хавфли босқичдир. Бунда хушёрликни йўқотмаслигимиз, инфекция жиловини қўлдан бой бермай, ҳаётимизни асрашимиз керак”, дейди Борис Жонсон.
Жонсоннинг бу эълонини эшитган Шотландия вазири Никол Стержен унга норозилик билдирди. Стерженнинг сўзларига кўра, “Уйда қолинг” иборасини “Хушёрликни йўқотманг” жумласига алмаштириш ҳалокатли бўлиши мумкин. Шундан сўнг Британия бош вазири ўз твиттер саҳифасида имкон қадар уйда бўлиш ҳамда дўстлар даврасини чеклаш кераклигини тушунтирди.
Эслатиб ўтамиз, Хопкинс университети маълумотларига кўра, Буюк Британия ўлим кўрсаткичлари бўйича АҚШдан кейин иккинси ўринда қолмоқда. Буюк Британияда шу кунгача 31 930 нафар одам вафот этди. Вирусга чалинганлар сони эса 216 525 нафарни ташкил этмоқда.
