Айниқса, шу йилнинг май-июнь ойларида Осиё олимпия кенгаши ва Киберспорт ассоциацияси ўртасида ўтказилган бир неча учрашувлар, онлайн мулоқотлар натижасида ушбу спорт турлари жамланмаси Осиё спорт турлари қаторида эътироф этилди.
Осиё олимпия кенгаши сайтининг маълум қилишича, киберспорт 2021 йили Ветнамда ўтказиладиган Жанубий-шарқий Осиё ўйинлари тақвимидан расмий спорт тури сифатида ўрин эгаллайди.
Хабарда келтирилишича, минтақанинг бир неча мамлакат спорт ташкилотлари ушбу спорт йўналишларини ўйинлардан жой олиши бўйича Осиё олимпия кенгашига ариза билан мурожаат этган. Жумладан, Филиппин киберспорт федерацияси раҳбари Рамон Сузаранинг ООКга йўллаган хатида «киберспортнинг минтақа ўйинлари таркибига кириши мусобақалар нуфузига ижобий таъсир кўрсатади», дейилган.
36 та спорт турини қамраб олган жанубий-шарқий Осиё ўйинларидан киберспортнинг жой эгаллаши келажакда қайсидир спорт турининг ўйинларнинг «девори» ортида қолишига олиб келиши мумкин. Боиси, 2019 йили Филиппиндаги мусобақалар олдидан жанубий-шарқий Осиё ўйинлари 36 талик спорт турлари «чизиғидан» чиқиб кетмаслик белгиланганди.
Ўзбек спорти курашнинг ушбу ўйинлар таркибида эканлигини инобатга оладиган бўлсак ва киберспортнинг Ветнам баҳсларига қайсидир спорт тури ўрнига қўшилишга «жон-жаҳди» билан ҳаракат қилаётганлигини назарда тутсак, хавотирларимиз ўринлидек бўлиши мумкин. Аммо, жанубий-шарқий Осиё ўйинларидаги яккакураш спорт турлари орасида Ўзбек спорти жозибали спорт турларидан бири сифатида қайд этилганлиги киберспорт – кураш «алмашинуви»га йўл қўймаслигига ишонишимизни таъминламоқда.
Тўлқин РЎЗИЕВ.
