Қарорга кўра, Лойиҳалар ва импорт контрактларини комплекс экспертиза қилиш маркази” ДМ “Лойиҳалар ва харидлар самарадорлигини ошириш маркази” ДМ (Марказ) этиб қайта ташкил этилади.

Қуйидаги ҳужжатларни Марказда комплекс экспертизадан ўтказиш амалиёти бекор қилинади, жумладан:

  • 2026 йил 1 апрелдан – лойиҳаолди ҳужжатларни ишлаб чиқиш учун техник топшириқлар. Бунда улар Марказнинг электрон ахборот платформаси (Платформа)да жойлаштириладиган намунавий шаклдан фойдаланган ҳолда ишлаб чиқилади;

2026 йил 15 апрелдан – қиймати 15 млн АҚШ доллари эквивалентидан кам бўлган қуйидаги лойиҳаларнинг лойиҳаолди ҳужжатлари:

  • бюджет тизими бюджетлари, давлат мақсадли жамғармалари, белгиланган тартибда ташкил этилган бошқа жамғармалар, Тикланиш ва тараққиёт жамғармаси маблағлари ҳисобидан молиялаштириладиган;
  • корпоратив буюртмачилар томонидан амалга оширилаётган;
  • 2026 йил 1 сентябрдан божхона тўловлари бўйича имтиёзлар қўллаган ҳолда импорт қилинадиган товарлар рўйхати. Бунда мазкур функция “Ўзбекэкспертиза” АЖга ўтказилади.

Қарорга кўра, 2026 йил 1 сентябрдан бошлаб Марказда лойиҳаолди ҳужжатларни комплекс экспертиза қилишнинг қуйидаги янги тартиб-таомиллари жорий этилади:

  • йирик ва мега лойиҳаларнинг ҳамда экспертизадан ижобий хулоса олган лойиҳаларга ўхшаш лойиҳаларнинг лойиҳаолди ҳужжатларини ишлаб чиқиш жараёнида уларнинг тайёр бўлимларини параллел экспертизадан ўтказиш амалиёти;
  • тақдим этилган лойиҳа илгари Марказда экспертизадан ўтган лойиҳа билан ўхшаш бўлса, Марказнинг таклифи асосида унинг лойиҳаолди ҳужжатини тезлаштирилган экспертизадан ўтказиш тартиби.

2026 йил 1 сентябрдан:

Марказ томонидан Лойиҳаолди ҳужжатларни ишлаб чиқувчи лойиҳа институтлари ва ташкилотларининг рейтинги (Рейтинг)ни юритиш амалиёти йўлга қўйилади. Бунда:

  • фаолияти давомида тармоқлар кесимида ишлаб чиқилган лойиҳаолди ҳужжатларнинг комплекс экспертизаси натижаларидан келиб чиқиб, лойиҳа институтлари ва ташкилотлари “юқори”, “ўрта” ва “паст” ишончлилик даражаларига ажратилади;
  • Рейтинг Платформада жойлаштирилиб, доимий равишда янгилаб борилади;
  • ўрта, йирик ва мега лойиҳаларнинг лойиҳаолди ҳужжатларини ишлаб чиқиш учун лойиҳа институтлари ва ташкилотларини танлашда фақат “энг арзон нарх” мезонидан воз кечиб, “сифат, тажриба ва нарх” мезони мажбурий ҳисобланади;
  • лойиҳа ташкилотлари ва ташаббускор (буюртмачилар)га нисбатан рағбатлантириш чоралари жорий этилади.