Афсуски, айрим одамлар берган қўлга раҳмат айтиш ўрнига туҳмат тошларини отмоқда. Ижтимоий тармоқларга чиқиб олиб, ҳокимият ва вазирликлар номига турли иғво ва бўҳтонларни уюштиряпти.
Ачинарлиси, иғвони тарқатишга тарқатиб, эртасига вакиллар гувоҳлар ёрдамида юзлашилгач, кечиринглар, мен полончининг сўзига ишонибман, писмадончи шундай дегани учун уни гапига кирибман, кўзларим 900 минг кўрибди, лекин кўзойнак билан қарасам, 500 минг экан каби куракда турмайдиган важ тўқимоқда. Баъзиларининг берилган маҳсулотлардан камчилик ахтариб, уялмасдан 5 грамм кам экан, деган гаплари одамнинг одамлик ғужурини қўзитиб юборади.
Уларга қараб э, одам бўлмай сатқаи сар кет, унинг ўрнига кенг даладек ястаниб ётган томорқангни ишлатсанг, тер тўксанг бўлмайдими, дегинг келади. Афсуски, ундаларга гап кор қилганида эди...
Чиндан томорқа худдики очилмаган қўриқ, геологлар тили билан айтганда топилмаган кон экан. Бу йил масофадан ишлаш тизимига ўтилганидан кейин бўш вақтим бироз кўпайди. Вақтимдан ҳамда кичик томорқамдан унумли фойдаланиш учун баҳордан енг шимаргандим.
Уйим 4 сотих. Томорқам ҳам ўзига яраша. Кўкламда помидор, бодринг, бақлажон, булғор қалампири, қалампир, кўкатлар экканман. Кўз тегмасин, ўша ердан анча фойда қиляпман. Билмаганимни ютуб орқали ўргандим. Худога шукр, натижа кутганимдан ҳам аъло бўлди. Дастурхонимда янги узилган сабзавот доим бўлдаи. Ортганини уйим ёнидаги дўконга олиб чиқиб сотяпман. Даромад ёмон эмас, майда ҳаражатларни қоплайди.
Тўғри, орамизда 3 сотихдан фойда кўриш мумкинлигини ақлига сиғдиролмайдиганлар ҳам бўлиши аниқ. Лекин оиламга даромад келиб турибди. Карантиндан фойдаланиб, 1 ҳафта олдин 50 та қопга картошка экиш тажрибасини ҳам қўллаб кўрдим, ҳозир уруғ ниш урди. Натижани ҳосил пишганда айтаман.
Маҳалла раиси жуда яхши инсон. Ҳар куни тонг саҳардан маҳалла айланади, кам таъминланган оилалар билан гаплашишни канда қилмайди. Кўпроқ томорқадан фойдаланиш бўйича ўз тажрибасидан маслаҳат беради. Мени ҳам аслида шу киши ундаган. Яқинда оиламиз учун яна бир яхшилик қилди. Маҳалла вазирлиги билан гаплашиб 50 та жўжа ва 2 та қўй олиб берди.
Ҳовлимнинг чеккасидан кичкина катак қилиб пастига қаватига қўзиларни, тепасига катак ясаб жўжаларни боқаяпман.
Яна ўша аввалдан бошлаган гапимизга қайтсак.
Гувоҳи бўляпман. Маҳалла ва оилани қўллаб-қувватлаш вазирлиги ходимлари ҳар бир хонадоннинг ҳолатини ўрганиб чияпти. Оиларнинг шароитидан келиб чиқиб, уларга беминнат ёрдам кўрсатяпти. Вазирликнинг қуйи кесимида “Саховат ва кўмак” акциясида одамларга озиқ-овқат, дори дармон, ҳаттоки боласининг памперсигача олиб бориб беряпти.
Миллий гвардия ходимлари, врачлардан кам ишламаётган яна бир ташкилот бор. Бу Маҳалла ва оилани қўллаб-қувватлаш вазирлиги бўлиб, уларга ҳам раҳмат айтиб қўйишни фуқаровий бурчим деб билдим.
Оддий фуқаро Н.Султонов
