Бу ҳақда АОКАда Оила ва хотин-қизлар қўмитаси ахборот хизмати раҳбари Саодат Боймирзаева иштирокида ўтказилган брифингда маълумот берилди.
Қайд этилишича, ҳафталик доирасида хотин-қизларни қўллаб-қувватлаш, уларнинг ҳуқуқ ва қонуний манфаатларини ҳимоя қилиш, иқтисодий, ижтимоий ва сиёсий фаоллигини ошириш, бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлашга қаратилган медиа танловлар ва тадбирлар ўтказиш назарда тутилган.
Шунингдек, узоқ йиллар вазирлик ва идораларда ишлаб келган нуроний онахонлар, “Аёллар дафтари” ва “Ёшлар дафтари”га киритилган хотин-қизлар “Янги Ўзбекистон боғи” ҳамда музейлар, тарихий масканлар, обидалар, зиёратгоҳ ва қадамжолар, театр, концерт, кино, кўнгилочар масканларга имтиёзли асосда ташрифлари ташкил этилади.
Ижтимоий тармоқларда ёшлар иштирокида “Аёлни эъзозлаш – эзгулик ва адолат мезони”, “Она – меҳр булоғи”, “Мен онам билан фахрланаман”, “Юрт тараққиётига менинг ҳиссам” мавзуларида флешмоб ва челленжлар ҳамда “Доим эътибордасиз!” шиори остида “Тиббиёт автобуслари” ташкил этилади ва маҳаллаларда ижтимоий ҳимояга муҳтож хотин-қизлар чуқурлаштирилган тиббий кўрикдан ўтказилади.
