Инвестициялар, саноат ва савдо вазири Лазиз Кудратов раислигида бўлиб ўтган йиғилишда янги инвестиция лойиҳаларини амалга ошириш ва республика ҳудудларида ишлаб чиқариш қувватларини кенгайтириш масалалари ҳам қизғин муҳокама этилди.
Унда Вазирлик раҳбар ва ходимлари ҳамда тармоқ бирлашмалари, тижорат банклари, маҳаллий ҳокимликлар раҳбарлари иштирок этди.
Йиғилишда мамлакатимизда саноат сиёсатини амалга оширишда замонавий меъёрий-ҳуқуқий базани шакллантириш, мамлакат саноатини ривожлантириш Стратегиясини ишлаб чиқиш, мавжуд ишлаб чиқариш қувватларини кенгайтириш ва янгиларини ишга туширишни жадаллаштириш бўйича тезкор чора-тадбирлар кўриш, кадрларни тайёрлаш ва малакасини ошириш тизимини яратиш каби зарур чоралардан иборат комплекс ёндашув муҳимлигига эътибор қаратилди.
Ҳудудларга бириктирилган Ишчи гуруҳлар ташкил этилган бўлиб, уларга жойларда чиққан ҳолда, фаолият юритаётган 1 300 дан ортиқ корхоналарнинг ишлаб чиқариш қувватларини кенгайтириш ҳамда чиқарилаётган маҳсулотлар ҳажмини ошириш имкониятлари бўйича ўрганиш ўтказиш ва таклифлар ишлаб чиқиш вазифаси юклатилди.
Шунингдек, Ишчи гуруҳларга қизиқиш билдирган маҳаллий тадбиркорларни жалб этган ҳолда турли соҳаларда 1 100 дан ортиқ янги инвестиция лойиҳаларини амалга ошириш истиқболларини ўрганиш топширилди. Бундан ташқари, замонавий асбоб-ускуналар етказиб бериш ва ўрнатиш билан боғлиқ муаммоларни аниқлаш мақсадида 2 мингга яқин инвестиция лойиҳаси ўрганилади.
Махсус иқтисодий, кичик саноат, ёшлар саноат ва тадбиркорлик зоналарини ривожлантириш бўйича навбатдаги чора-тадбирлар алоҳида кўриб чиқилди.
Вазирлик Ишчи гуруҳларининг ҳудудлардаги фаолияти якунлари бўйича 2023 йилда саноатни жадал ривожлантириш чора-тадбирларини ўз ичига олган Дастур тайёрланади.
«Саноат тўғрисида»ги Ўзбекистон Республикасининг Қонуни, «Ўзбекистон Республикаси саноатини ривожлантириш Стратегияси» лойиҳаларини ишлаб чиқиш, шунингдек, йирик ишлаб чиқариш корхоналари қошида мутахассислар назарий билимларни олиш ва амалий кўникмаларни ўзлаштиришлари мумкин бўлган муҳандис кадрлар тайёрлаш мактабларини ташкил этиш чоралари вазирлик фаолиятининг алоҳида йўналишлари сифатида белгиланди, деб хабар беради Инвестициялар, саноат ва савдо вазирлиги матбуот хизмати.
