Азизанинг боқувчиси йўқ, ёлғиз фарзандини тарбиялайди. Иқтисодий жиҳатдан қийналиб қолгач, бундан уч йил олдин “Аёллар дафтари”га киритилган эди. Шундан бошлаб давлатимиз томонидан ижтимоий ҳимояга муҳтож аёлларга қандай имтиёз, кўмак берилаётган бўлса, у ҳам ҳеч биридан четда қолмади. Мутасаддилар кўмагида аёл 2021 йилда оилавий тадбиркорликни бошлаш учун “Халқ банки”нинг туман филиалидан кам фоизли кредит олди. Бу пулга мўъжазгина иссиқхона қурдирди.
— Ўтган йили туман ҳокимлиги томонидан менга 10 миллион сўмлик субсидия берилди, 4 гектар ер ажратилди. У ерга электр токи ўтказилиб, насослар ўрнатилди. Ўша йилнинг ўзида яна 33 миллион сўм имтиёзли кредит олдим. Дастлаб ихчамгина бўлган иссиқхонамизни кенгайтирдик, — дейди Фориш туманидаги Қизилқум маҳалласида яшовчи Азиза Худойбердиева. — Биринчи йили кўкат экиб кўрдим, 5 миллион сўм даромад олдим. Ишларимни ривожлантиришим учун олган бу маблағ етарли эмас эди. Шунда баҳорда кўчат етиштирдим. Биринчи йили 30 мингта кўчат экдик, яхши фойда кўрдик, қарзларимнинг катта қисмидан қутулдим. Лекин даромадимнинг чўғи барибир кўнглимдагидек эмасди. Ҳозир ҳар бири 6 сотихлик иккита иссиқхонам бор. Бу йил 300 мингта помидор, қовун-тарвуз кўчати етиштирдик. Бундан ташқари, бодринг, булғор қалампири ниҳолини ҳам ўстирдик. Оилавий ишлаб, кредитларимизни ёпяпмиз. Бу орада шу яқин атрофда яшовчи 10 нафар хотин-қиз иш билан таъминланди.
Азиза Худойбердиева пешона тери, ҳалол меҳнати билан турмуш қийинчиликларидан асло чўчимади, меҳнатни ор билмади. Ўзига берилаётган барча имкониятлардан унумли фойдаланди. Натижада нафақат ўзи ва оиласи, балки маҳалладошларини ҳам иш билан таъминлашга эришди. Тадбиркорлигини муваффақиятли йўлга қўйиб, “Аёллар дафтари”дан чиқди.
— Бугун юртимизда қандай ишга қўл урмоқчи бўлсангиз, ҳаммаси учун имконият бор. Фақат ҳаракат қилиш керак. Мана шу эътибор туфайли ишларимнинг самарасини кўриб келяпман, — дейди тадбиркор Азиза Худойбердиева. — Ҳозир 500 мингта кўчатга буюртма олганман. Бўшаган ерлар ўрнига саримсоқпиёз экиш ниятим бор. Уларни қишки мавсумгача тайёр қилиб, январь ойида кўкат сифатида бозорга чиқармоқчиман. Келгусида замонавий иссиқхона қуришни режа қилганман. Шунинг учун ҳаракатдаман. Яна 10 нафар хотин-қизни иш билан таъминламоқчиман. Яқиндан гулчиликка қизиқиб қолдим, шу соҳада ўқиб, туманимизда гулчиликни ривожлантиришга ҳиссамни қўшмоқчиман. Бу йил биогумус ишлаб чиқиб, сотувини йўлга қўйсак, марра — бизники.
Зомин сув омбори яқинида ташкил этилган бозорчани маҳаллий сайёҳлар яхши билади. Бу ерда меҳмонларга мазали қурут ва доривор гиёҳлар сотиб тадбиркорлигини бошлаган Марҳабо Холиқованинг қўли қўлига тегмайди. Зомин туманининг “Дуоба” қишлоқ фуқаролар йиғинида яшовчи бу аёл ўтган йили “Аёллар дафтари”га киритилган эди. Ижтимоий муҳофазага муҳтож бошқа аёллар каби у ҳам зарур ёрдамни олди. Жумладан, уйига қуёш панели ўрнатиб берилди.
— Дастлаб қурут сотиб тирикчилигимизни ўтказганмиз, — дейди Марҳабо Холиқова. — Ҳозир бозорчамиз кенгайгани сари растамиздаги маҳсулотларимизнинг ҳам тури кўпайяпти. Узоқ-яқин мамлакатлардан сайёҳлар келиб, ушбу маҳсулотларни катта қизиқиш билан харид қилишади. Тайёрланиш жараёнини эринмай сўраб олишади.
Тадбиркор фаолиятини кенгайтириш мақсадида қизи билан сайёҳлар учун турли тақинчоқлар тайёрлаш, юмшоқ қўғирчоқлар тўқишга киришди. Рўзғорини иқтисодий жиҳатдан тиклаб, “Аёллар дафтари”дан чиқишга муваффақ бўлди. Давлатимизнинг ғамхўрлигини ўзида ҳис этган инсон сифатида бошқаларга намуна кўрсатди.
Холниса РАҲМОНҚУЛОВА,
журналист
