Юртимизда яратилаётган имкониятлардан самарали фойдаланаётган, эътибордан янада руҳланиб, бошқаларни ҳам шунга ундаб яшаётган жафокаш ва фидойи хотин-қизлар кўпчиликни ташкил қилади. Бугун уларнинг фаолиятига назар ташласангиз, нафақат ўз рўзғори, балки қишлоқдошлари, маҳалладошларининг ҳам ҳаётини безаётганига гувоҳ бўласиз.
Ҳеч қачон таслим бўлманг
— Бу ҳунарни эгаллашимга мени ҳаёт мажбур қилган, — дейди Жиззах вилоятининг Фориш туманида яшовчи Барно Хўжанова. — Турмушга чиққанимда 2-курс талабаси эдим. Кетма-кет фарзандларим туғилди. Шу сабабли ўқишни ташлашга мажбур бўлдим, диплом ололмадим. Эҳтиёжларим учун пул керак эди. Тикувчилик билан шуғулланишга мажбур бўлдим. Биринчи ишимни қайнонамнинг эски тикув машинасида бошлаганман...
Барно Хўжанова 20 йилдан бери тикувчилик билан шуғулланади. Тўрт йилдан буён Ҳунармандлар уюшмаси вилоят бўлими аъзоси. 2019 йили Қўқонда ўтказилган Халқаро ҳунармандлар фестивалига таклиф қилинди. Ҳунарманд ўзи тиккан 20 дан ортиқ миллий либослар билан иштирок этди. Бу тадбир унга жуда катта рағбат берди. Юртимизда тадбиркорларга яратилган кенг имтиёзлардан фойдаланиб, кредит олди. Иш ҳажмини кенгайтириб, тикув машиналари харид қилди. Бир йилда 20 нафардан ортиқ қизга ҳунар ўргатди. Ҳозир шогирдлари ҳаётда ўз ўрнини топган.
— Дастлаб тадбиркорлик ишимни бошлаш учун маблағим йўқ эди, — дейди ҳунарманд. — Ярим тунгача буюртмалар тикардим, чунки мижозларимни йўқотишдан қўрққанман. Опам маҳсулотларимни бозорга олиб чиқишга ундаган. Секин-секин иш бошладим, бозорга чиқдим. Фойдани фойдага улаб, аста-секин маблағни кўпайтириб олдим...
Худога шукр, ишларим юришиб кетди. Шогирдларимнинг ўз йўналиши бор: бири парда, бошқаси дастурхон, яна бири кўрпа-тўшак тикади. Болалар учун либос тикадиган қизлар бор. Ҳаммасини қобилиятига қараб ўргатганман. Энди турли безак, аксессуарлар — тож, гултож, тақинчоқлар тайёрлашни ўргатмоқчиман. Бу ишлар қийин эмас, фақат иштиёқ бўлиши керак. Жисмоний имконияти чекланган бир шогирдим бор, “Ёшлар дафтари”да туради, унга субсидия олиб беришга ҳаракат қиляпман. Яхшиям ёзишни билади, шу ҳолатда у билан гаплашамиз.
У гўзаллик салонида ишлайди, менга тикиш ишларида ёрдам беради, ўзини ўзи маблағ билан таъминлайди. Атрофимдаги ёшларни ҳам руҳлантиряпман. Инсонда шижоат бўлиши, доим олға юриши керак. Ҳадеб давлатдан сўрайвермай, одамнинг ўзиям ҳаракат қилса, кўп нарсага эришади. Ҳаммаси яхши ниятга боғлиқ, инсон доимо ҳавас билан яшаши керак. Ота-онанинг дуоси вожиб, дейдилар. Барно чевар доим онасига кўйлак тикиб, кўнглини олган. Шундай пайтларда онаси уни дуо қиларди... Улар оилада етти опа-сингил. Бир-бири билан доим тажриба алмашиб туради, Барнога қанот бўлишади.
— Ўқувчиларимга фақат тикишни эмас, ҳаёт сирларини ҳам ўргатаман, тўғри йўналиш беришга интиламан, — дейди тикувчи. — Қайси жабҳада бўлманг, ёшлар кимнинг боласи бўлмасин, уларни тўғри йўлга бошлаш керак. Келгусида тадбиркорликнинг бошқа турлари билан шуғулланиш истагим бор. Ўғилларим Ватан ҳимоячиси, қизимдан ҳам кўнглим тўқ. Болаларимнинг келажагини қайсидир маънода таъминладим, деб ўйлайман.
Биз, ота-оналар шунга масъулмиз. Ҳозир ижарада туриб ишлаяпман, келажакда ўз корхонам бўлишини хоҳлайман... Одам битта йўналишда тўхтаб қолиши керак эмас. Шу боис, яқинда гулчиликни ҳам йўлга қўймоқчиман. Гуллар одамга илҳом бағишлайди. Фориш туманини гул билан таъминлайман, деган мақсадни ўз олдимга қўйганман. Қишлоғимда мени ҳамма яхши ном билан тилга олишини истайман. Ҳалол меҳнат билан ҳаётимизни чароғон қилишга улгуришимиз керак.
Ҳунар инсонни улуғлайди
— Мамлакатимизда ҳунармандликка қаратилаётган эътибордан, тадбиркорлар қўллаб-қувватланаётганидан куч олиб, мен ҳам ўз ишимни йўлга қўйдим, — дейди жиззахлик тадбиркор Дилноза Ўктамова. Ёш дизайнер 2019 йилдан буён “Ҳунарманд” уюшмаси вилоят бўлимига аъзо, якка тартибдаги тадбиркор. Ҳозир 5 нафар ишчиси бор. Гул босилган газламалар ва чокли буюмлар йўналишида фаолият юритади. Дилноза болалигидан тикувчиликка қизиқарди. Онасининг ёнида юриб, касб сирларини ўрганди. Айтишича, бу ҳунарнинг бошини тутган учинчи авлод вакили. Олдинига бир неча тикувчилик цехларида ишчи бўлиб ишлади, кейин ўз тадбиркорлигини йўлга қўйди. Иккита тикув машинаси билан иш бошлади.
Кейинчалик фаолиятини кенгайтириш учун “Микрокредитбанк”нинг ҳудудий филиалидан 30 миллион сўм кредит олди. Иш ўрни очиб, қизларни иш билан таъминлади. У изланишлари самараси ўлароқ, ҳунарини мукаммал ўрганишга, бошқа ҳамкасбларининг тажрибасини ўзлаштиришга интилди. Замон талаблари асосида миллийлик билан замонавийликни уйғунлаштиришга ҳаракат қилди. Интилишлари бесамар кетмади, парда, йўрмадўзлик, қуроқ, миллий ва замонавий либослардан ташқари каштадўзликни ҳам ўз ишига татбиқ этди. Миллий матоларни аёллар сумкаларида безак сифатида қўллашни йўлга қўйди.
Тиниб-тинчимаган Дилноза тадбиркорликдан ташқари, вилоятдаги Хотин-қизлар тадбиркорлик марказида ҳам дарс бера бошлади. Бу ерда ўз касбини ёшлар, ишсиз аёлларга ўргатиб, уларнинг ҳам ўз йўлини топишига кўмаклашмоқда. Миллий маҳсулотлар ўз жозибадорлиги билан кишининг дилини яйратади. У тайёрлаган либослар ва бошқа маҳсулотларни кўриб, турли танлов ҳамда лойиҳаларга иштирок этиш учун таклиф қилишади.
Дилноза вилоятда бўлиб ўтган “Нафосат” кўрик-танлови, “Jizzakh Beauty” ёшлар форумида иккинчи, “Ташаббус–2021” танловида учинчи ўринни эгаллаган. “Шарқ аёли”, “Навқирон Ўзбекистон” фестивали, ”Энг улуғ, энг азиз”, “Намунали аёл иш берувчи” танловларида ғолибликни қўлга киритган. Республика миқёсида ташкил этиладиган турли кўргазмаларда ўз ишлари билан фаол иштирок этиб келади.
— Ҳунар одамни улуғлайди, — дейди дизайнер. — Инсон ҳалол меҳнат қилса, олға интилса, бошқаларга ҳам кўмакдош бўлса ва атрофдагиларни шунга ундаса, албатта, бир кун ишининг роҳатини кўради. Келгусидаги ниятим миллий маҳсулотларни жаҳон бозорига олиб чиқиш, иш ўрнини кенгайтириб, аёллар бандлигини таъминлашга ҳисса қўшмоқчиман. Яқинда ёш тадбиркор изланишлари ортидан яна бир ютуққа эришди — халқаро USAID ташкилотининг 50 миллион сўмлик грантини ютиб олди. Бу маблағни қўлга киритгач, у иккита компьютерли тикув машинаси харид қилди. Шулар асосида ўз бренди остида тайёр миллий либосларни бозорга чиқаришни режа қилган.
