Таълим сифатини назорат қилиш давлат инспекцияси бошлиғи Улуғбек Тошкенбоев олий таълим муассасаларининг халқаро рейтингларда эришган натижалари хусусида сўзлаяпти.
– Ушбу ижобий ўсиш кўрсаткичлари миллий олий таълим муассасаларимизнинг халқаро рейтингдаги ўрнига ҳам таъсир кўрсатмоқда. Уларнинг натижалари йилдан-йилга яхшиланиб бормоқда, – дейди Улуғбек Тошкенбоев. – Хусусан, Ўзбекистон миллий университети QS ташкилотининг математика соҳасида эришган натижаларига кўра, дунёнинг кучли 500 талик университетлари қаторидан ўрин олди.
Times Higher Education томонидан 2022 йил учун эълон қилинган Осиё университетлари рейтингидан 10 та олий таълим муассасамиз ўрин олди. Бундан ташқари, Times Higher Education ташкилотининг 2022 йил учун THE Impact Rankings рейтингидан 30 та олий таълим муассасамиз жой эгаллади.
QS ташкилотининг Ривожланаётган Европа ва Марказий Осиё давлатлари рейтингидан Ўзбекистон миллий университети, "Тошкент ирригация ва қишлоқ хўжалигини механизациялаш муҳандислари институти" миллий тадқиқот университети, Тошкент давлат техника университети ва Самарқанд давлат университети ўрин олди.
