Икки йиллик танаффусдан сўнг катта спортга кириб келган ҳар қандай спортчида қанчалар кучли тайёргарлик бўлмасин, ғалабага ишончдан кўра хавотир ҳисси устунроқ бўлиши табиий. Тўғри, мухлислар назарида бугун катта спортга қайтдим, аслида эса мен ундан ҳеч қачон кетганим йўқ.
Негаки бу спорт турига беш ёшимдан акаларим сабабли қадам қўйганман. Матда ўтириб, спортчиларнинг хатти-ҳаракатларини томоша қилардим. Катта акам ўша пайтда тахминан 90 кг кўтарар эди. Оғир атлетикачилар хотирамда Гераклдек бир паҳлавонлар сифатида қолган. Шу боис, тош кўтаришга бўлган муҳаббатим давомли ва кучли. Шундай экан, мен нима учун оғир атлетикадан кетишим керак.
Икки йил давомида тинимсиз машғулотлар, изланишлардан тўхтаб қолганим йўқ. Шунинг учун бўлса керак, Тошкентда ўтказилган Осиё чемпионатидан Андижонга ёруғ юз билан қайтиш насиб қилди. Ўша пайтда 90 килограмм тош кўтарган акаларига ҳавас қилган болакай бугун улғайиб, 241 килограмм тошни кўтарди. Шунақанги олқишлар бўлиб кетдики, бу ғалабадан ҳам кўра кучлироқ завқ берди менга. Назаримда, мухлисларим катта спортга қайтганим, жаҳон рекордини янгилаганимдан ўзимдан ҳам кўра кўпроқ қувонди. Юртимиз байроғини баланд кўтариб, кўзга суртиш бахти яна насиб этганидан, шу эл, шу юртга ютуқлар олиб келишга қодир бўлганимдан хурсандман. Бу ёғига фақат машғулотлар, кучли тайёргарликлар устида ишлаймиз. Жонажон ватанимизга қанча ғалаба олиб келсак, шунча кам. Зеро, мамлакатимизда спортга, соғлом турмуш тарзи тарғиботига қаратилаётган катта эътибор, бунинг учун яратиб берилаётган шарт-шароит ва қулайликларга жавобимиз бошқача бўлиши ҳам мумкин эмас. Қолаверса, халқимиз, Президентимиз спортчиларга катта ишонч билдирган. Бу ишончни оқлаш эса бизнинг миннатдорчилигимиз ифодаси бўлади.
Шуни алоҳида айтмоқчиманки, аслида спортда қийин ёки осон деган тушунча йўқ. Ҳаммаси ўзингизнинг мақсад ва интилишингизга боғлиқ. Катта спорт остонасида турган, айнан оғир атлетикада катта марраларни мўлжаллаётган ёшлар фақат ва фақат олдинга интилиши керак. Ортга қайтиш спортчига хос эмас. У ортга қайтса, енгилади.
Оғир атлетикачи барча спортчилар каби қатъиятли бўлиши лозим. Спортчи ақл ва мақсадга ҳам таяниши керак бўлади. Негаки, мағлубият онларида айнан шу жиҳатлар унга далда беради. Зеро, қайси соҳада бўлмасин, айниқса, спортда мағлубият аччиқ бўлса-да, жуда муҳим. Мағлубиятдан кимлардир ёниб кетади, кимлардир ўчиб қолиши мумкин. Ўзим ҳам қатнашган ҳар битта мусобақамда биринчи бор ютқазганман, фақат иккинчи бор муваффақиятга эришганман. Неча бор қўл силтаб кетишга уринганман. Лекин “нега мен уддалай олмайман, ўзимни қўлга олишим керак”, деган қаъият билан ўзимга далда берганман. Спортчининг ақл ва мақсадга таяниб иш тутиши мана шундай бўлади. Ана ўшандагина бугунгидек муваффақиятларга эришиш, элнинг ишончини қозониш мумкин. Қитъа чемпионатида бизга шундай имкониятлар яратиб берган мутасаддиларга, ғалабаларимиздан биздан кўра кўпроқ қувонган мухлисларга чин дилдан миннатдорлик билдираман.
Руслан НУРИДДИНОВ,
Оғир атлетика бўйича жаҳон чемпиони,
жаҳон рекордчиси
