– Бизда тупроқ, иқлим, сув шароитини ҳисобга олганда, билимли мутахассислар етишмайди, – дейди университет ректори Рустам Холмуродов. – Шунинг учун ҳам бугун тадбиркорларимиз чет элдан мутахассис олиб келиб, улар кўмагида тадбиркорлик ишларини йўлга қўймоқда. Нега биз ўзимиз шундай мутахассисларни тайёрламаймиз? Агар етук агрономлар ўзимизда тайёрланса, халқнинг озиқ-овқатга бўлган эҳтиёжи қондирилади. Шунингдек, чет элларга экспортбоп маҳсулотлар ҳам етиштирилади. Эҳтиёждан келиб чиқиб, университетда агробиотехногиялар ва озиқ-овқат хавфсизлиги факультети очишни режалаштирдик.
Дарҳақиқат, янги ўқув йилидан бошлаб университет қошида Тайлоқ агробиотехнологиялар техникуми очилади. Техникумга 300 нафар талаба қабул қилинади. Университет профессор-ўқитувчилари факультетда ҳам техникумда ҳам бирдек фаолият олиб боради. Техникумни аъло баҳоларга битирган ўқувчилар университетнинг ўша йўналишдаги факультетига 2-курсдан имтиҳонсиз қабул қилинади.
Университет тасарруфида яна бир техникум – Жомбой педагогика техникуми фаолияти йўлга қўйилади. Янги ўқув йилидан ушбу техникумга ҳам талабалар қабул қилинади. Бундан ташқари, университетда ҳуқуқшунослик факультети очилади.
– Чет давлатларда ҳар бир соҳанинг ўз ҳуқуқшунослари бор. Биз ҳам келажакда шундай мақсадларни олдимизга қўйиб, ҳуқуқшуносларга бўлган эҳтиёжнинг ортиши боис ҳуқуқшунослик факультетини қайта очишга қарор қилдик. Ҳозирча факультетга 50 нафар талаба қабул қилинади, – дейди университет ректори.
Шунингдек, сиртқи таълим шаклида таълимни янада самарали ташкил этиш учун сиртқи таълим факультети фаолияти йўлга қўйилади. Янги очилаётган факультетларда 2020-2021 ўқув йилидан “Фуқаролик жамияти ва миллий ғоя”, “Ҳуқуқшунослик ва ҳуқуқ таълими”, “Иқтисодиёт ва менежмент”, “Агрокимё ва ўсимликларни ҳимоя қилиш”, “Мева-узумчилик ва сабзавотчилик”, “Тупроқшунослик ва қишлоқ хўжалик технологиялари” ва “Масофавий таълим” кафедралари ташкил этилади. Қолаверса, университетда янги ўқув йилидан дастурий инжиниринг таълим йўналишларида кадрлар тайёрланаётгани муносабати билан “Дастурий таъминот ва инжиниринг” кафедраси ҳам очилади.
Шунингдек, механика ва математика факультети бундан буён математика факультети деб номланади. Иқтисодиёт ва бизнес факультети ҳамда ҳарбий кафедра тугатилади. Бундан ташқари, университетда қўшимча иккита ўқув бино ҳамда учта талабалар ётоқхонаси қурилмоқда.
