Амалдаги тартибга кўра, жисмоний шахслар ўз эҳтиёжлари учун 2 тагача мобил қурилма олиб кириши мумкин. Бунда қурилмалар қиймати божсиз олиб кириш меъёридан ошса, ошган қисмига товар қийматининг 30 фоизи миқдорида ягона божхона тўлови ундирилади.
Шунингдек, хориждан олиб кирилаётган мобил қурилмалар йўловчи божхона декларациясида кўрсатилиши шарт. Декларация кейинчалик қурилмани UzIMEI тизимида рўйхатдан ўтказиш учун асос бўлиб хизмат қилади.
“Тошкент халқаро аэропорти” чегара божхона пости ходимлари томонидан 20–22 сентябрь кунлари Дубайдан учиб келган уч нафар йўловчининг ҳаракатлари текширилган.
Улар божхона ходимларининг оғзаки сўрови ва йўловчи божхона декларациясида маълум қилмаган ҳолда 8 та янги iPhone 18 ва 6 та iPhone 17 смартфонини олиб киришга уринган.
Маълум қилинишича, ушбу қурилмаларнинг умумий қиймати 227 миллион сўмни ташкил этади.
“Тошкент-АЭРО” ихтисослаштирилган божхона комплекси маълумотларига кўра, йил бошидан буён қиймати 7,8 миллиард сўмлик 162 та мобил қурилманинг ноқонуний олиб кирилишига чек қўйилган.
Божхона органлари хориждан қайтиб келаётган фуқароларни ўзлари билан олиб кираётган мобил қурилмаларни йўловчи божхона декларациясида кўрсатишга чақирмоқда.
Таъкидланишича, қурилмани декларация қилиб олиб киришда божсиз олиб кириш меъёридан ошган қисми учунгина ягона божхона тўлови ундирилади. Ноқонуний олиб кирилган қурилмаларни кейинчалик UzIMEI тизимида рўйхатдан ўтказиш жараёнида эса телефоннинг тўлиқ қийматидан 30 фоиз тўлов ундирилади.
Айни пайтда юқоридаги ҳолатлар юзасидан божхона текширувлари давом эттирилмоқда.
