32 ёшли пойтахтлик фуқаронинг айтишича, у турмуш ўртоғи билан рейтинги баланд умумий овқатланиш шохобчасига кирган.
Эркакнинг сўзларига кўра, улар интернетдаги кўплаб мақтовли изоҳлар асосида ифторлик қилиш учун айнан шу кафени танлашган.
10-15 дақиқада кабоб олиб келинган. Ҳомиладор аёл кабобни тоновул қилаётган чоғида бирданига тўхтаб, ранги оқариб, эрига: “Гўштда нимадир қимирлаяпти!”, деган. Эркак гўшт бўлагини синчиклаб кўздан кечира бошлаган ва ичидан тирик чувалчангни кўриб қолган. У дарҳол официантни, у эса иш бошқарувчини чақирган, кейин эса уларнинг олдига кафенинг эгаси келган.
“Хотинимнинг қаттиқ кўнгли айниди, бош оғриғидан шикоят қилди, мен тез ёрдам чақирдим. Шифокорлар ҳомиладорликни мураккаблаштирадиган ҳолатни аниқлашди. У ҳали ҳам ўзини яхши ҳис қилмаяпти, эрталаб яна қусди. Мен хотиним ва туғилажак болам учун хавотирдаман, ўзимни қўярга жой тополмаяпман. Биз саккиз йилдан бери фарзанд кутамиз!” деди у.
Эркакнинг ўзи ҳам тиббий ёрдам сўраган. Айтилишича, фельдшер унга ўткир гастроэнтерит ташхисини қўйган ва маҳаллий шифокорга мурожаат қилишни тавсия қилган.
Ҳозирда эр-хотин кафени текширтириш учун керакли ҳужжатларни тўплашди. Шунингдек, ёш оила судда адолатга эришишга бел боғлаган, деб хабар беради tengrinews.kz.
